Каспий мен Жайықты жалғады

«Жолаушылар тасымалы» АҚ Тәуелсіздік мерекесі қарсаңында еліміздің батыс өңірінің тұрғындары үшін тамаша тарту жасады. Тек батыс халқы ма, барша қазақстандықтар үшін жағымды жаңалық – Қарт түбекті Жайықпен жалғастырған жолаушы пойызының жолға шығуы болды.

«Орал-Маңғыстау» бағытындағы жолаушылар пойызын қарсы алған түбектіктердің көлкөсір қуанышына ортақ болып біз де вокзалға келіп, ақжолтай пойыздың алғашқы жолаушыларына ұсынылған дәмнен ауыз тидік. 

Желтоқсанның онынан жүре бастаған жаңа құрам Маңғыстау станциясына 12 желтоқсанда келіп жетті. Пойызды Маңғыстау вокзалында теміржолшылар бастаған жергілікті халық шашу шашып, зор қошеметпен күтіп алды. Пойызбен жеткен жолаушылар өздерінің құрметіне жайылған ақ дастарханда бауырсақ, шұбаттан дәм татып, лебіз-тілектерін білдіріп, мәз-мейрам көңіл-күймен тарасты. Жолаушылардың айтуынша, бұл пойыздың бағыты да көңілден шығады, Маңғыстауға келіп-кететін уақыты да қолайлы. «Оралдан келерде барар жерге күндіз жетіп, жолға шығар болсақ күнімен бар шаруамызды реттеп болып кетеді екенбіз» дейді олар.

– Бұл «Жолаушылар тасымалы» АҚ-ның Тәуелсіздік меркесіне орай халыққа жасаған тосынсыйы болды. Келіп-кетіп жатқан жолаушылар ерекше алғысын білдіруде. Әрине, қуанышты жайт, өйткені бұдан былай жолаушылар Орал қаласына тіке баратын мүмкіндік алып отыр. Бұған дейін ол үшін қосымша бір ғана вагон жүретін. Вагон Маңғыстау – Мәскеу пойызына тіркеліп, Ақтөбеге дейін жетсе, одан әрі қарай Орал пойызына жалғанатын. Енді Маңғыстау станциясынан бір құрам қатынайды. Пойыз жұп күндері жүреді. Бізге түскі сағат 14.49-да келсе, кешке 22.05-те қайта қозғалады. 6 купе, 2 плацкарт вагондарынан тұрады. Оралдан Маңғыстау станциясына дейін 35 сағат 47 минут жүреді. Сол аралықта елуден астам бекет, станцияларды басып өтеді, – дейді Маңғыстау вокзалының бастығы Айгүл Әмірова. 

Пойыз түбек вокзалына сегіз вагонда 320 орынның 217-сі толып келіпті. Маңғыстау станциясынан 9 вагон болып қайта жолға аттанды. Маңғыстаудан жолға аттанғалы тұрған халық та аталған бағыттағы пойыздың алғашқы жолаушылары екенін біліп, өз орындарына қуана жайғасып жатты. Кері аттанарда жаңа пойызға 372 орын берілген, соның 360 билеті сатылған. Демек бұл жаңадан ашылған «Орал-Маңғыстау» бағытындағы жолаушылар тасымалына қазірдің өзінде халықтың сұранысы жоғары деген сөз.