Вагон паркін жаңарту жалғасады

«Жолаушылар тасымалы» АҚ тарих қойнауына табысталған өткен жылды табысты тәмамдады. Былтыр барлығы 19 миллион билет сатылса, соның ішінде онлайн-сатылым үлесі 77% құраған. Демек, халықтың басым бөлігі пойызға билет сатып алуда электрондық жүйеге ден қойған.

«Жолаушылар тасымалы» АҚ алға тартқан мәліметтерге сүйенсек, жалпы ұлттық тасымалдаушы жылына орташа есеппен алғанда 13,5 млн жолаушыға қызмет көрсетіп отыр. Қазақстандықтар арасында билетке сұраныс жоғары бағыттар қатарында Астана – Алматы, Астана – Шымкент, Алматы – Шымкент, Астана – Семей және Алматы – Семей бағдарлары болып отыр.  

«Жолаушылар тасымалы» АҚ жолаушылардың өтініш-тілектерін қанағаттандыру және оларға мейлінше қолайлы жағдай жасау бағытында игілікті іс-шараларды жүзеге асыруды жалғастырып келеді. Соның бірі, әйелдер вагонын пайдаланушылар қатары жылдан-жылға артып келе жатқанын атар едік. №77/78 «Алматы-Маңғыстау», №351/352 «АлматыМаңғыстау», №45/46 «Павлодар-Түркістан», №37/38 «Маңғыстау-Семей», №47/48 «АтырауАстана», №33/34 «Ақтөбе-Алматы-1», №4/3 «Астана-Алматы-2», №71/72 «Астана-Шымкент» бағдарлары бойынша қатынайтын 8 жолаушылар пойызына тіркелген әйелдер вагонын былтыр 161 мыңға жуық жолаушы пайдаланған. Сонымен қатар 532 мыңға жуық мүмкіндігі шектеулі жандар, олардың жүріп тұруына ыңғайлы купелер қызметіне жүгінген.  

Көптің көңілінен шығып, сұранысқа ие болып отырған «Жолаушылар тасымалы» АҚ ұсынып отырған келесі бір қызмет – «Күту парағы» десек, қателеспейміз. Былтыр осы қызметке 500 мыңға жуық жолаушы жүгініп, 172 мың билет сатылған. Бұл қызметті bilet.railways.kz сайтында немесе «Жолаушылар тасымалы» АҚ-ның билет кассаларында пайдалану мүмкіндігі бар.  

Қазіргі таңда Қазақстанда 140 бағдар бойынша пойыздар қатынаса, соның 99 бағдарына «Жолаушылар тасымалы» АҚ қызмет көрсетеді, ал 14 бағдар жекеменшік, тағы 10 бағдар өзге теміржол әкімшіліктерінің еншісінде. Ұлттық тасымалдаушының вагон паркінде 2151 бірлік шамасында вагон бар және парктің орташа тозуы 44%-ды, ал вагондардың орташа жасы 17 жылды құрап отыр. «Жолаушылар тасымалы» АҚ вагон паркін кезең-кезеңмен жаңартуда. Компания былтыр отандық «ЗИКСТО» зауытымен жолаушылар вагондарын сатып алуға келісімшарт жасасып, зауыт тарапынан 94 жаңа вагон жеткізілді. Бүгінде олар «Маңғыстау-Атырау», «Ақтөбе-Атырау» және «Павлодар-Түркістан» бағдарларында қатынауда. Жолаушылардың жайлылығын қамтамасыз ету үшін жаңа вагондар ауа баптау жүйесімен, ауа сүзгілерімен, түтін датчиктерімен, биодәретханалармен, тамбурларда бейнебақылау жүйелерімен, ал купелер электр розеткаларымен және USB-лермен жабдықталған. Вагондар дұрыс пайдаланылған жағдайда жылжымалы құрамның қызмет ету мерзімі 40 жылды құрамақ. Жолаушылар вагондарын жаңалау биыл да жалғасады. Қазақстанда жасалған тағы 62 бірлік вагон жеткізіледі деп күтілуде. Ал 2025-2030 жылдар аралығында Stadler компаниясының 537 вагонын сатып алу жоспарлануда, бұл 2030 жылға қарай парктің орташа жасын 13 жасқа дейін қысқартпақ.