Наурызда пойыздың қатынауы өзгертілген уақыт белдеуіне бейімделеді
2024 жылдың 1 наурызынан Қазақстанның барлық облыстарындағы сағаттар үшін бірыңғай бесінші уақыт белдеуі енгізіледі.
Осылайша Астана, Алматы, Шымкент қалалары мен Абай, Ақмола, Алматы, Жамбыл, Жетісу, Қарағанды, Қостанай, Павлодар, Солтүстік Қазақстан, Түркістан, Ұлытау және Шығыс Қазақстан облыстары уақытты 1 сағатқа артқа жылжытады.
Бұл өзгеріс осы өңірлерге қатынайтын жолаушылардың теміржол тасымалына да әсер етпек, деп хабарлады 24.kz телеарнасы.
«Жолаушылар тасымалына жауапты пойыздардың уақыт кестесін жасағанда Қазақстан бойынша бірыңғай уақыт белдеуінің енгізілетіні ескерілді. Наурыз айында пойыздардың келу-кету уақыты ортақ уақыт белдеуі бойынша болады. Бұл өзгеріс жолаушы билеттерінде де қарастырылған. Енді азаматтардың өз сағаттарындағы және техникалық құрылғыларындағы уақыт көрсеткіштері дұрыс болса болды. Сондай-ақ жол жүрушілерге сапарларын алдын ала жоспарлап, билетте көрсетілген уақытқа мұқият болуға кеңес береміз. Cұрақ туындаса, 1433 телефон номеріне хабарласуға болады», - деді "Жолаушылар тасымалы" АҚ Баспасөз қызметінің өкілі Нұрсұлтан Ибраев.
Яғни пойызға міну үшін билеттегі уақыттан бір сағат ерте, не кеш келудің қажеті жоқ. Өз сағатыңызды түзесеңіз жеткілікті. Өйткені билетте уақыт айырмашылғы есептелген.