Мерекелік пойыздар жолға шықты
Елорда вокзалдарынан Наурыз мейрамына орай арнайылап безендірілген бірнеше пойыз жолға шықты, деп хабарлайды Rail-news.kz.
Атап айтқанда №3/4 «Астана-Алматы», №85/86 «Астана-Шымкент» және №7501/7502 «Астана-Павлодар» бағыттары бойынша этникалық стильде безендірілген пойыздар рейске шықты. Жолаушыларды ұлттық киім киген жолсеріктер қарсы алды.
Мерекелік пойыз керемет салтанатпен жолға аттанды. Жолсеріктер домбыра тартып, ән шырқады. Ұлттық киімдегі теміржолшылар жолаушыларға мерекелік көңіл-күй сыйлайтын еліміздің ұлттық тағамдары «наурыз көже» мен бауырсақ ұсынды.
«Жолаушылар тасымалы» АҚ Бас директоры Жәнібек Тайжанов жолаушыларға мерекелік көңіл-күй сыйлайтын мұндай дәстүр жыл сайын өткізіліп келе жатқанын айтады.
«Елімізде аталып өтетін мерекелермен жолаушыларды құттықтау компанияның дәстүрінің маңызды құрамдас бөлігі. Айта кетейік, «Жолаушылар тасымалы» АҚ компаниясы жыл сайын жолаушыларға мерекелік көңіл-күй сыйлай отырып, пойыздарды ерекше стильде безендіруді әдетке айналдырған. Биыл Наурыз мейрамына орай қосымша үш пойызды жолға шығардық. Олар Астана-Алматы, Астана-Шымкент және Астана-Ақтөбе рейстері. Оған қоса 18-25 наурыз аралығында пойыздарға қосымша вагондар жалғанатын болады. Олардың саны шамамен 250-дей болады», - деп атап өтті, «Жолаушылар тасымалы» АҚ Бас директоры Жәнібек Тайжанов.
Сонымен қатар ол Наурыз мейрамы кезінде қазақстандықтар еліміздің барлық өңіріне қатынай алатынын жеткізді. Мейрам күндері жолға шығатын қосымша вагондар 17 мыңдай орынды қамтымақ.
Астана-Алматы пойызының жолсерігі Темірлан Советханов әр мереке сайын жолаушыларды құттықтап, жақсы көңіл-күй сыйлауға тырысатындарын айтады.
«Бұған дейін жолаушыларды Рамазан айының келуімен құттықтадық. Ол кезде ауыз бекіткен жолаушыларға су, құрма ұсындық. 8 наурызда нәзік жанды жолаушыларымызға гүл сыйладық. Енді ұлттық Наурыз мейрамымен құттықтап, бауырсақ, наурыз көже ұсынып, әр жолаушының көңілін аулап жатқан жайымыз бар», - дейді жолсерік.
Этникалық стильдегі пойыздар 2024 жылдың наурыз айының соңына дейін жүреді.
Айта кетейік, бұл мерекелік акция еліміздің барлық өңірлерінде өткізіледі. Компанияның жолсеріктері мен қызметкерлері пойыздардың ішінде және перрондарда барлық жолаушыларды Наурыз мейрамымен құттықтайды!
