ҚТЖ Алакөлге қатынайтын пойыздарда орын санын арттырады
ҚТЖ басшылығы Алакөл көліне баратын жолаушылар пойыздары мен вокзалдардың туристік маусымға дайындығын тексерді. Осыған орай «Атамекен» ҰКП өкілдерімен, Көлік министрлігімен және салалық қауымдастықтар, туроператорлар және демалыс аймақтарының иелерімен жазғы тасымалдау мәселелері бойынша жиналыстар өткізілді, деп хабарлайды Rail-news.kz.
Үкімет отырысында Премьер-Министр Олжас Бектенов инфрақұрылымдық мәселелерді кешенді дамытуды, қызмет көрсету сапасын түбегейлі арттыруды және демалыс аймақтарына пойыздар санын көбейтуді тапсырды.
Өткен жылмен салыстырғанда, биыл жазда «Жолаушылар тасымалы» АҚ пойыздарындағы орындар саны Алакөл көліне дейін 16 мыңға артады. Бұл бағытта Ұлттық тасымалдаушы Астана, Алматы, Шығыс Қазақстан және Абай облыстарынан 12 маршрут бойынша 270 мыңнан астам жолаушы тасымалдауды жоспарлап отыр. Оның ішінде 10 маршрут бойынша «Жолаушылар тасымалы» АҚ пойыздары қатынайтын болады. Сондай-ақ, биыл тұрғындардың өтініші мен сұранысын ескере отырып, алғаш рет Қызылордадан Алакөл көліне пойыз жүреді.
Астана мен Алматы қаласының тұрғындары арасында Алакөл көліне қатынайтын жолаушылар пойыздары үлкен сұранысқа ие. Елордадан жазғы маусымда №53/54 және №254/253 «Астана-Достық» бағытындағы пойыздар қатынайды.
Жаз мезгілінде Алматыдан «Алматы-Достық» бағытында №207/208, №221/222, №211/212, №21/22 және №6942/6941 5 пойыз қатынайтын болады.
Шығыс Қазақстан және Абай облыстарынан жүретін пойыздар Өскемен, Семей, Шар, Аягөз қалалары арқылы өтеді. Жазда бұл бағыттарда №457/458 «Семей-Достық» және №459/460 «Өскемен-Достық» пойыздары қатынайды. Қызылордадан Достыққа тікелей қатынайтын №21/22 және №6942/6941 пойыздары күн сайын шамамен 150-ге жуық жолаушы тасымалдауға мүмкіндік береді.
Туристік маусымның басында Жаланашкөл, Ақши және Бескөл курорттық станцияларының ғимараттары мен платформалары, жаяу жүргінші жолдары жөндеу жұмыстарынан өтіп, электр жарықтандыру, дауыс зорайтқыштары техникалық жарамдылыққа тексерілді. Сондай-ақ, ғимараттардың іші мен сыртында қосымша орындықтар орнатылды.
Жолаушыларға ыңғайлы болу үшін станцияларда кассирлердің ауысымдық жұмысы ұйымдастырылды. Сондай-ақ, билеттерді bilet.railways.kz сайттында және «Жолаушылар тасымалы» АҚ пойыздарының билет кассаларында комиссиясыз сатып алуға болады.