Жолаушылар тасымалының аймақтағы қызметкерлері су тасқынымен күрестегі еңбегі үшін марапатталды
"Қазақстан теміржолшысы" газетінің тілшісі
«Жолаушылар тасымалы» АҚ-ның аймақтардағы қызметкерлері Астанада бас қосты. Оның ішінде бірқатар қызметкер су тасқынымен күрестегі еңбегі үшін марапатталды.
Елордаға жиналған қызметкерлердің дені халықпен тікелей жұмыс істейтін, оларға қызмет көрсететін мамандар. Нақтырақ айтсақ билет кассасы және анықтамалық бюроның қызметкерлері. Олардың көпшілігі су тасқыны және өзге де төтенше жағдай кездерінде аянбай еңбек еткен жандар. Көктемгі су тасқыны болған аймақтардан ҚТЖ 23 мыңнан астам адамды тегін тасымалдағанын айта кету керек.
«Жолаушылар тасымалы» АҚ-ның басқарма төрағасы Жәнібек Тайжанов еліміздің әр түкпірінен жиналған қызметкерлерді атқарып жатқан еңбектері үшін алғыс білідіріп, бірқатар маманды су тасқынымен күрестегі белсенді еңбегі үшін марапаттады.
«Сіздердің жолаушылар тасымалына қосып жатқан еңбектеріңіз орасан. Еңбектеріңіз көзге көріне бермегенімен, ол өлшеусіз. Қыста боранды күндері өзге көлік түрлері тоқтап қалғанда және су тасқыны кезінде темір жол көлігі қиын жағдайда қалған халыққа шұғыл көмекке келді. Көптеген адамды тегін жеткіздік, оның үстіне су тасқыны болған аймақтардан 1,5 мың баланы лагерлер мен сауықтыру орындарына жеткізу сынды жұмыстарды атқаруда сіздердің еңбектеріңіз орасан. Компания сіздердің еңбектеріңізді бағалайды және алғыс білдіреді», - деді Ж. Тайжанов.
Әр аймақтан келген мамандар екі күн бойы біліктілік арттыру семинарына қатысады. Ол жерде жолаушымен дұрыс қарым-қатынас жасау, күйзеліске төзімділік, іскерлік этика бойынша дәрістер тыңдайды.