«Туған елге саяхат» пойызы қызықты саяхатқа аттанды
Атырау, Солтүстік Қазақстан, Батыс Қазақстан, Ақтөбе, Қостанай, Ақмола, Қарағанды және Ұлытау облыстарындағы табиғи апаттан зардап шеккен және көп балалы, аз қамтылған отбасылардың балалары «Туған елге саяхат» пойызында қызықты саяхатқа аттанды, деп хабарлайды Rail-news.kz.
Пойыз Астана, Бурабай, Алматы, Тараз, Түркістан, Қарағанды, Байқоңыр қалалары арқылы өтеді. Саяхат 12 күнге созылады.
Пойызда 7 купе вагоны және екі мейрамхана вагоны бар. Барлық вагондарда кондиционерлер орнатылған және жас жолаушылардың жайлы әрі қауіпсіз саяхаты үшін барлық қажетті жағдайлар жасалған. Одан бөлек бұл пойызда вагондардың алынбалы жабдықтары (төсек-орын жабдықтары, перделер және т.б.) ақ түске жаңартылған.
Балаларды жол бойы 18 маман, соның ішінде мұғалімдер, психолог, медицина қызметкерлері және аниматорлар алып жүреді.
Соңғы 5 жыл ішінде «Жолаушылар тасымалы» АҚ «Самұрық-Қазына» АҚ қолдауымен жүзеге асырылатын «Туған елге саяхат» жобасын белсенді қолдап келеді. Ыңғайлы пойыздарды қамтамасыз ете отырып, Ұлттық тасымалдаушы осы бастамалардың сәтті жүзеге асырылуына өз үлесін қосуда.
