Билет бағасы қымбаттады

Елімізде пойызға билет қымбаттап отыр. ҚР Көлік министрлігінің келісімі бойынша теміржол жолаушылар тасымалының тарифтері 20%-ға көтеріледі. Жаңа тариф ағымдағы жылдың 1 қазанынан күшіне енеді.

Әлеуметтік маңызы бар бағыттар бойынша жолаушыларды тасымалдау бағасын, яғни тарифтерді көтеру ҚР «Теміржол көлігі туралы» заңның 12-бабына сәйкес жүзеге асырылуда. Елімізде 140 бағдар бойынша жолаушы пойызы қатынайтын болса, жол жүру ақысының қымбаттауы 62 бағдарға әсер етпек. Бірақ салқындатқыш жүйесі жоқ вагондарда 20%-ға дейін жеңілдіктің болатынын да ескерген жөн.  

– Жол ақысын көтеру туралы шешім макроэкономикалық жағдайға байланысты. Инфляция қарқыны, оның ішінде жолаушыларды тасымалдау құнын құрайтын тауарлар мен қызметтер бағасының өсуі субсидиялар мен тарифтердің өсу қарқынынан айтарлықтай асып түсіп отыр. Сонымен қатар вагон паркін жаңарту қажет, көрсетілетін қызметтер сервисін жақсартып, қызметкерлердің жалақысын арттыру керек. Оның үстіне соңғы 10 жылда әлеуметтік маңызы бар бағыттар бойынша инфляция деңгейіне индексацияны қоспағанда, жолаушыларды тасымалдау бағасының өсуі байқалмағанын ескеру қажет, – дейді «Жолаушылар тасымалы» АҚ өкілі Нариман Дүйсекеев.  

Жолаушылар вагон паркіне келсек, қазір еліміз бойынша қатынап жүрген 2667 вагонның шынында 44%-ның тозығы жеткен. Сондықтан жекеменшік тасымалдаушылардың да, ұлттық тасымалдаушының да күн тәртібіндегі басты мәселесі – вагон паркін жаңарту болып отыр. Және бұл бағытта қозғалыстың бар екенін де айта кету керек. Мәселен, нақты деректерге сүйенсек, 2023 жылы 118 вагон, ал 2024 жылы 140 жолаушылар вагоны сатып алынған. Алдағы 2025 жылдан бастап жыл сайын 200 бірліктен астам вагон сатып алу жоспарға енгізілген.