ҚТЖ-ның электр пойыздарында буфет ашылды

№6829/6830 «Астана-Көкшетау» және №6803/6804 «Астана-Атбасар» бағыттарында қатынайтын электр пойыздарында жолаушыларға жол барысында жеңіл тамақтануға арналған буфеттер ашылды, деп хабарлайды Rail-news.kz.

Буфет вагонында ыстық тағамдар қарастырылмаған, алайда жолаушыларға күнделікті қолжетімді бағамен жаңа піскен нан-тоқаш өнімдері, сусындар, жеңіл тағамдар, шоколад және ыстық сусындар ұсынылады. Бұл ассортимент жолаушыларға жол бойында жеңіл тамақтанып, сапарды одан әрі ыңғайлы өткізуге жағдай жасайды.

Буфет вагондары электр пойыздарының сапары кезінде жол бойы жұмыс істейді. Буфет вагонында бір жолаушыға арналған орташа чек, сусындарды қоса алғанда 700–1000 теңге шамасында болады.

Айта кетейік, №6829/6830 «Астана-Көкшетау» және №6803/6804 «Астана-Атбасар» бағыттарындағы электр пойыздарының жол жүру уақыты шамамен 4 сағатты құрайды.