"Астана-Семей" пойызының вагондары жаңартылды
Абай облысы бойынша меншікті тілші
Еліміздің шығысында да жолаушы тасымалындағы қызмет сапасы жыл санап артып келеді. Осыған дейін әлеуметтік желілерде әсіресе жеке тасымалдаушыларға қатысты вагондардың сапасыздығы жайлы сын көп айтылатын-ды. Сыннан нәтиже шығып, бірқатар іс-шаралар жүзеге асырылуда.
Мәселен, жолаушылар нөпірі әрдайым мол, №121/122 «Астана-Семей» бағыты бойынша қатынайтын жолаушылар пойызының вагондары жаңартылды. Аймаққа қызмет көрсететін «Арай Транс KZ» ЖШС жеке тасымалдаушысы үш жаңа жолаушылар вагонын сатып алды. Ендігі аралықта заманауи талаптарға сай жабдықталған екі плацкарт және бір купе елорда мен ел шығысына қатынайтын жолаушыларға тұрақты түрде қызмет көрсететін болады. Вагондар ауаны баптау жүйесімен, био-дәретхана кешендерімен, USB коннекторы бар гаджеттерді зарядтауға арналған розеткалармен және өзге де тұрмыстық қажеттіліктермен жабдықталған. Бұл жылжымалы құрам Абай облысының өндірісі дамыған көлемді үш ауданын басып өтіп, жолда Саяқ, Балқаш, Қарағанды қалаларына аялдайды. «Жолаушылар тасымалы» АҚ-на қарасты №353/354 Астана – Семей және №457/458 Семей – Достық пойыздарының вагондары да жаңартылып, қолайлылық біршама артқан болатын.