Семейде қаламаңы тасымалында тиімді бағдарлар көбейеді
Абай облысы бойынша меншікті тілші
Семей ЖТ бөлімшесі бойынша қаламаңы тасымалында жетістік жоқ емес. Өткен жылдың соңында №6834/6833 «Шар – Семей» және «Ақтоғай – Аягөз» бағытындағы №6824/6823 жаңа жолаушылар пойызы іске қосылып, облыстағы қалаішілік тасымал үш бағытқа көбейген болатын.
Айта кетерлігі, аталған маршруттар жолаушылар үшін ыңғайлы кестемен аптасына 6 рет жүреді. Басқа көлік түрлерімен салыстырғанда ең қолжетімді көлік әрі жыл бойы ең төмен тариф белгіленген. Әсіресе қысқы қарлы боран, көктайғақ салдарынан болатын автожолдардағы қозғалыс шектеулері кезінде ерекше тиімді екенін толығымен дәлелдеді. Осыған дейін «аталған бағыттар өзін ақтамауы мүмкін, тек шығынға ғана жұмыс істейді» деген кереғар пікірлер де болған. Бағдарды жүргізу құқығын жеңіп алған «Жолаушы тасымалы» АҚ өз міндеттемесін сапалы орындады.
Жалпы, өткен 10 айдың ішінде Семей ЖТ бөлімшесі бойынша қаламаңы жолаушы тасымалын 30 мыңға жуық адам пайдаланған. Облыстық басқарма жүргізген мониторинг нәтижесі көрсеткендей, әсіресе, туристік маусым қарқын алған шақта, жазғы мезгілде Семей-Жалаңашкөл бағытына сұраныс жоғары болған.
Сонымен қатар облыс әкімдігі тарапынан субсидияланатын аталмыш бағыттағы жолаушылар пойызының вагондары жаңартылып, саны да артқан.
Ендігі жылы оған қосымша тағы екі бағыт – Семей – Ауыл және Семей – Дегелең бағыттары қосылуы мүмкін. Қазіргі таңда «Абай облысының жолаушылар көлігі және автомобиль жолдары басқармасы» мемлекеттік мекемесі Семей ЖТ бөлімшесі басшылығымен бірлесіп, аталмыш бағыттарды іске қосудың мүмкіндіктерін зерттеуге әзірлік жасауда. Бұл бағыттағы шаралар алдағы жылы басталмақ. Егер жоба жергілікті тұрғындар арасында қолдау тапса, тиімділігі дәлелденсе, облыстық әкімдік тарапынан қаржыландыру мәселесі қарастырылатын болады.