ҚТЖ пойыздарында Аяз ата мен Ақшақар жас жолаушыларды Жаңа жылмен құттықтауда

Жаңа жыл қарсаңында «Жолаушылар тасымалы» АҚ Kaztechnology компаниясымен бірлесіп, безендірілген пойыздар мен электр пойыздарында жолаушыларға құттықтау шараларын ұйымдастыруда, деп хабарлайды Rail-news.kz.

Аяз ата мен Ақшақар кейпіндегі жолсеріктер жолаушыларға көтеріңкі көңіл-күй сыйлап, балаларға ерекше сыйлықтар тарту етуде. Бүлдіршіндер қуанышпен тақпақтарын оқып, мерекелік шараның жарқын қатысушыларына айналып отыр. Жаңа жылдық шара аясында 2000-нан астам балаға сыйлық табыс етіледі.

№4/3 «Астана–Алматы», №6803/6804 «Астана–Атбасар», №7507/7508 «Астана–Көкшетау» және №7553/6811/6812/7556 «Қарағанды–Астана–Бурабай» бағытындағы пойыздар қар ұшқындары, қысқы пейзаждар, шырша ойыншықтары мен гирляндалармен безендірілген. Бұл пойыздар қаңтар айына дейін қатынап, жолаушыларға мерекелік көңіл-күй сыйлайды.

Жолаушылар жолсеріктерге алғыстарын білдіріп, Жаңа жыл мерекесінде безендірілген пойыздарда сапарлау ерекше әсер қалдырғанын атап өтті. Олардың айтуынша, балалар үшін пойызда Аяз ата мен Ақшақарды көру – ұмытылмас қуаныш пен естелікке толы қызықты сәт болды.

Айта кетейік, Аяз ата мен Ақшақар Жаңа жылды қарсы алатын түні де пойыздарда жолаушыларды құттықтайды.