«Jibek Joly» танымал турға айналды
«Қазақстан теміржолшысы» газетінің тілшісі
«Jibek Joly» теміржол туры іске қосылғаннан бері 540 турист теміржолмен саяхатты таңдаған. Жоба Орталық Азияның көрнекті бренді бола алатын перспективалық туристік өнім ретінде танылып отыр.
Бұл туралы Алматыда өткен жиында туризм саласының өкілдері мәлімдеді. «Жолаушылар тасымалы» АҚ «Оңтүстік» аймақтық филиалының директоры Руслан Жалғасбай да өткен жылдың қараша айында іске қосылған Қазақстан мен Өзбекстан арасындағы «Jibek Joly» трансшекаралық теміржол турының танымалдығы артып келе жатқанын растады.
Оған жергілікті туристер ғана емес, шетелдіктер де қызығушылық танытуда екен. Түркия, Қырғызстан, Украина және Ресей тұрғындары туристік пойызбен саяхаттаған. Спикерлердің айтуынша, бұл жоба аймақтық туризмді дамытуға жаңа мүмкіндіктер ұсынады, мәдени байланыстарды нығайтуға және туристік ағынды арттыруға септігін тигізеді.
Бүгінде туристік пойыздың Қазақстан мен Өзбекстан арасындағы екі саяхаты сәтті жүзеге асты. Бұл жолы бағдарға Орталық Азиядағы көне қалалардың бірі Тараз қосылды. Үшінші сапар Наурыз мерекесіне жоспарланған. «Алматы – Түркістан – Ташкент – Самарқанд – Тараз – Алматы» бағдары бойынша саяхатқа 300 турист аттанады. Турлар сатылымы тәмамдалуға жақын, бұл саяхатшылар арасында туристік пойызға сұранысты көрсетеді. Халықаралық турдың ұзақтығы бес күнді құрайды. Саяхатшылар ежелгі қалалардың ерекше атмосферасына еніп, Ұлы Жібек жолының ізімен саяхаттайды және екі елдің көрікті жерлерін аралайды.