Еліміздің пойыздарында 8 наурыз мерекесіне орай әйелдерге сыйлықтар табысталды
Халықаралық әйелдер күніне орай Қазақстанның барлық бағыттарындағы жолаушылар пойыздарында мерекелік акция ұйымдастырылып, мыңдаған әйел жолаушыларға гүлдер мен естелік сыйлықтар табыс етілді, деп хабарлайды Rail-news.kz.
Елдің әр өңірінде таңертеңнен бастап жолсеріктер жолаушы аруларды жылы ықыласпен қарсы алып, мерекелік сый-сияпат жасады. Күтпеген тосынсый алған жолаушылар шынайы қуаныштарын білдіріп, жолсеріктерге алғыстарын жеткізді. Сонымен қатар, кейбір пойыздар мерекеге сай безендіріліп, жолаушыларға ерекше көктемгі көңіл-күй сыйлады.
Ұлттық тасымалдаушы мен Kaztechnology компаниясы жыл сайын ұйымдастыратын бұл акция игі дәстүрге айналды. Оның негізгі мақсаты – сапардағы жолаушыларға мерекелік көңіл-күй сыйлау.
Айта кетейік, жыл сайын «Жолаушылар тасымалы» АҚ пойыздарымен 13,5 миллионнан астам жолаушы сапар шегеді, оның тең жартысы – әйелдер. Осыған байланысты компания әрдайым жолаушыларына жайлы жағдай жасап, ерекше көңіл-күй сыйлауға мән береді.
