Jibek Joly пойызы: Наурыз мерекесіне арналған ерекше теміржол туры

Көктемнің жарқын мерекесі – Наурыз мейрамы қарсаңында Jibek Joly бағытындағы үшінші теміржол саяхаты басталады. 20-25 наурыз аралығында туристер әз-Наурызды бірден екі елде – Қазақстан мен Өзбекстанда атап өтпек. Бұл жолғы маршрут кеңейтіліп, Орталық Азияның көне қалаларының бірі – Тараз да тізімге қосылды, деп хабарлайды Rail-news.kz.

Jibek Joly туристік пойызы алғашқы сапарын 2024 жылдың қараша айында жүзеге асырды. Сол уақыттан бері бұл бағытпен екі рет халықаралық теміржол туры ұйымдастырылды. Туризм саласындағы бұл ерекше жоба тек қазақстандықтардың ғана емес, сондай-ақ Түркия, Қырғызстан, Украина, Ресей және басқа елдерден келген саяхатшылардың да қызығушылығын тудыруда.

Наурыз мерекесіне арналған үшінші теміржол туры Алматы, Түркістан, Ташкент, Самарқанд және Тараз қалаларын қамтиды. Бес күндік сапар барысында саяхатшылар көне шаһарлардың тарихи атмосферасына еніп, Ұлы Жібек жолының мәдени мұрасымен, екі елдің бай дәстүрлерімен танысады.

Туристер Наурыз мейрамына орай ұйымдастырылған этноауылдағы түрлі шараларға қатыса алады. Мерекелік бағдарлама ұлттық дәстүрлер мен ерекше сән-салтанатқа толы болмақ:

- Концерттік бағдарламалар;

-Дәстүрлі әдет-ғұрып көрсетілімдері;

-Ұлттық тағамдардан дәм тату.

Саяхатшылар бұл сапар барысында нағыз шығыс қонақжайлығын сезініп, сапалы туристік қызмет түрлерін пайдалана алады:

- Кәсіби гидтің сүйемелдеуі;

- Заманауи вагондарда жайлы орналасу;

- Тамақтану қызметтері;

-Экскурсиялық бағдарламалар.

Наурыз мейрамына арналған бұл сапарға 350-ге жуық турист қатысады деп жоспарланып отыр. Бұл теміржол турының жоғары сұранысқа ие екенін көрсетеді. Жоба ұйымдастырушылары алдағы уақытта да Ұлы Жібек жолы бағыты бойынша жаңа сапарлар ұйымдастыруды көздеуде.

Jibek Joly туристік пойызы тек демалыс қана емес, мәдени мұраны дәріптейтін маңызды бастамаға айналып отыр. Наурыз мерекесінде тарихи қалаларды аралап, қазақ және өзбек халықтарының дәстүрімен танысу – ұмытылмас әсер сыйлайтыны сөзсіз.