Stadler Kazakhstan вагондары 10 мың шақырымдық сынақтан өтті
Астанадағы «Штадлер Қазақстан» зауытында өндірілген жаңа жолаушылар вагондары 10 000 шақырымнан астам сертификациялық сынақ жолдарын сәтті еңсерді, деп хабарлайды Rail-news.kz.
Сынақтар қыркүйек айында басталып, Кеден одағының ТР ТС 001/2011 техникалық регламентінің талаптарына сәйкес жүргізілуде. Тестілік жүрістер еліміздің әртүрлі теміржол учаскелерінде өтуде. Заманауи вагондар Қарағанды, Тараз, Шымкент және Өскемен бағыттарында сынақтан өткізілді.
Тексеру барысында жаңа вагондар тежеу жүйесінің сенімділігін, жүріс бөлігінің орнықтылығын және қауіпсіздік жүйелерінің тұрақтылығын көрсетті.
Жаңа вагондардың басты артықшылықтары – жолаушылардың жайлылығы мен қауіпсіздігін арттыруға бағытталған заманауи инженерлік шешімдер мен ойластырылған эргономика. Әр купеде жеке климат-бақылау жүйесі, розеткалар мен USB-порттар, жолсерікті шақыру батырмасы, сондай-ақ мүмкіндігі шектеулі жандарға арналған тактильді белгілер қарастырылған. Вагондар тіпті күрделі климаттық жағдайларда да пайдалануға бейімделген. Вагондардың қызмет ету мерзімі – 40 жыл.
2025 жылдың соңына дейін зауыт Ұлттық тасымалдаушыға алғашқы партияны тапсырады. Оның құрамына купейлік, плацкарттық, мүмкіндігі шектеулі жандарға арналған арнайы вагондар және генераторлық вагондар кіреді. Сонымен қатар, Stadler жылжымалы құрамға 20 жыл бойы сервистік қызмет көрсетуді қамтамасыз етеді.
Жалпы, 2030 жылға дейін 557 жаңа вагон пайдалануға беріліп, компанияның вагон паркі 100%-ға жаңартылады.
2026 жылдан бастап Stadler пойыздары № 3/4 «Астана—Алматы», № 353/354 «Астана—Семей», № 85/86 «Астана—Шымкент», № 47/48 «Астана—Атырау» бағыттарына шығарылады.
Вагон паркін жаңарту және Stadler вагондарын енгізу – еліміздің теміржол саласының дамуындағы маңызды кезең, ол қызмет көрсету сапасын және жолаушылардың қанағаттанушылық деңгейін арттыруға ықпал етеді.