Көмірге кідіріс жоқ
«Қазақстан теміржолшысы» газетінің тілшісі
Биыл жылыту маусымына дайындық басталғаннан бері, яғни 1 мамырдан 16 қыркүйекке дейін теміржол көлігімен 23,5 млн тонна көмір тасымалданды, бұл жоспар көрсеткішінен 1%-ке артық.
2019-2020 жылдар аралығында коммуналдық-тұрмыстық қажеттіліктер үшін және халыққа көмір өнімінің қажеттілігі 10,4 млн тоннаны құрайды. Бүгінгі күні 4,9 млн тонна немесе 47% көмір дайындалды. Бұл туралы ОКҚ өткен брифингте ҚР Индустрия және инфрақұрылымдық даму вице-министрі Қайырбек Өскенбаев мәлімдеді.
«Облыстар бойынша көмір тиеу жоспарының орындалуы: Ақмола, Павлодар, Түркістан, Қостанай, Алматы қалалары бойынша 100% астам, ШҚО, Қарағанды, Астана қалалары бойынша 90% астам, Алматы және Солтүстік Қазақстан облыстары бойынша 80% астам», – деді Қайырбек Өскенбаев.
ҚР ИИДМ бірінші вице-министрі өткен жылдан бастап көмір бағасы өзгермегенін атап өтті. Көмір бағасы барлық облыстар бойынша бақылауда тұр. Апта сайын бағалар бойынша жиынтық ақпарат министрге және Үкіметке беріледі. Нұр-Сұлтан қаласы бойынша көмір төрт разрезден әкелінеді. Шұбаркөл көмірінің құны 11,4 мың теңгені, Екібастұз көмірі 9,5 мың теңгені құрайды, Қаражыра көмірінің бағасы 11-13 мың теңгеден, Майкөбе көмірі 12,5 мың теңгеге дейін өзгереді.
Облыс және қала әкімдіктері шілде айынан бастап көмір дайындауды бастады, тұрақты негізде көмір жеткізу мониторингін жүргізеді, жергілікті атқарушы органдарда халыққа көмірдің сату нүктелері және көмірдің бар екендігін түсіндіру үшін жедел желі құрылатын болады.