Жүк тасымалындағы ахуал қандай?

 Елдегі төтенше жағдайға қарамастан Ақтөбе жүк тасымалы бөлімшесі жылдың бірінші тоқсанын табысты қорытындылады. Барлық көрсеткіштер жоспарға сай, тіпті асыра орындалған. Өңірде жүк тасымалының өнімділігі тек наурыз айында 1млрд 859,7 млн ткм нетто болып, 104,2 пайызға орындалды. 2019 жылдың осы кезеңімен салыстырғанда жүк айналымы 111,2 пайызға артық. Үш айдағы жүк айналымы техникалық жоспарға сай 4 млрд 711 млн ткм нетто құрап, жоспар 103,9 пайызды көрсетті.

Наурыз айында жүк тиеу тәулігіне 730 вагонға жоспарланса, өңірде ол 845 вагонға орындалған. Динамикалық жүктеме үш айдың нәтижесі бойынша 57,28 т/ваг құрап, 102,6 пайызға жетіпті. Бөлімшеде наурыз айында 64,56 т/вагон жүк жөнелтілді. Тәулігіне 1327 вагон жүк қабылданып, үш айдағы жоспарды орындау 96,1 пайызды құраған. Жүк түсіру жұмыстары да жоспардан артығымен орындалды.

Бұл көрсеткіш наурыз айында тәулігіне 378 вагонды құрап, меже 129,1 пайызға артығымен орындалған. Үш айдағы мәліметтерді тізген Ақтөбе жүк тасымалдау бөлімшесінің техникалық бөлім басшысы Жасұлан Рсқалиевтың айтуынша, вагон айналымының көрсеткіші де ойдағыдай. Тәулігіне 2,13 жоспарымен 101,9% құрады. Вагон айналымы өткен жылдың дәл осы кезеңмен салыстырғанда 99,5 пайызға тең. Вагон айналымының баяулауы вагонның жұмыс паркін тәулігіне 136 вагонға ұлғайтумен, сондай-ақ жүк тиелген вагондарды қабылдаудың тәулігіне 140 вагонға азаюымен байланысты.

Ал көктемнің алғашқы айында локомотивтік өнімділік 105 пайызға жетіп, жыл басынан бері жоспар бойынша орындалған жұмыс көлемі 101,6 пайызды құраған. Еңбекті қорғау жұмыстары да ойдағыдай. Алғашқы тоқсанда Ақтөбе жүк тасымалы бөлімшесінде жарақаттану жағдайлары болған жоқ. Қозғалыс қауіпсіздігінің жай-күйі де ақаусыз. Алғашқы тоқсанды абыроймен жапқан бөлімше жыл ішінде де экономикалық ахуалды құлдыратпауға күш салып отыр. Дегенмен, індеттен кейін "не болады?" деген сұрақ тек теміржол саласын емес, бүкіл елді алаңдатып отырғаны анық.