Тұйық желілер түгел қамтылды
Абай облысы бойынша меншікті тілші
Бүгінде ел шығысында жылу беру маусымы жылдағыдан ертерек басталып кеткендіктен Семей ЖТ бөлімшесінің теміржолшылары көмір тиеу мен жеткізу жұмыстарын жоспар аясында қарқынмен жүргізуге көшті.
Бөлімшенің басты әріптесі Қаражыра көмір кенішінен көмір тиелген вагондар саны қазіргі таңда тапсырысқа сай 420-ға жеткізілді. Сонымен қатар, жылжымалы құрамдарды уақытында жеткізу, вагон айналымындағы кедергілерді болдырмау мақсатында кешенді жұмыстар жүргізілді.
Қазіргі күні аймақтағы барлық тұйық желілер 100% көмірмен қамтамасыз етілген. Әсіресе, жылу беру нысандарын қатты отынмен қамтуға ерекше көңіл бөлінуде.
Облыстағы ЖЭЦ пен жылу көздерінде 290 мың тонна көмір түсіріліпті. Бұл 140% қор бар деген сөз. Жеткізу келісімшартқа сәйкес жүргізілуде.
– Тұрғындардың жылыту маусымындағы жалпы қажеттілігі 1123,6 мың тоннаны құрайды. Ал, қазіргі таңда 1101,7 мың тонна көмір немесе 98% жеткізілді. Соның нәтижесінде қазіргі күні барлық тұйық желілерде қарбалас, кезекке тұру көріністері орын алған жоқ, – дейді бұл ретте Семей ЖТ бөлімшесінің логистика және жүк тасымалын ұйымдастыру бөлімінің мамандары.
Ауа температурасының күрт төмендеуіне байланысты облыстағы барлық әлеуметтік нысандар мен білім беру ошақтарына жылу берілген. Бұл тұтыну көлемін жылдағыдан да арттыратыны белгілі. Әйтсе де, тасымал қарқынының толастамауына байланысты тосын жайттар орын алған жоқ. Семей теміржолы бойынша учаскелік станция саналатын 2-ші класты Дегелең станциясында да үдеріс барысы кедергісіз жүргізілуде.
– Жаз мезгілінің өзінде тәулігіне ең кемі 280 вагонға көмір тиеп жөнелтіп отырдық. Соның нәтижесінде, Шығыс өңіріндегі көптеген жылу орталықтарын қатты отынмен мезгілінен бұрын қамтамасыз еттік. Сонымен қатар, Ресей мен Қырғызстанға да көмір жөнелтілуде. Өткен айдан бастап тапсырысқа қарай тиелетін көмір көлемін біртіндеп арттырып келеміз. Сұраныс арта қалса, 490 вагонға жүк артуға мүмкіндігіміз бар. Себебі, көмір тасымалында кідіріс болмауы, жүкті жеткізуші теміржолшыларға сөз келмеуі тиіс, – дейді пікір білдірген Дегелең станциясы бастығының орынбасары Қайрат Ибраев.
Семей ЖТ бөлімшесі басшысы Сиязбек Әлішевтің қатаң назарға алуымен көмір тиеу мен жеткізуде бұрынғы жылдардағыдай вагон тапшылығын болдырмау мәселесі күн тәртібінде өткір тұр.