Шымкенттен Сарыағашқа дейін автобустармен трансфер ұйымдастырылады
«Қазақстан теміржолшысы» газетінің тілшісі
«Жолаушылар тасымалы» АҚ тағы бір қосымша қызметті жолға қойып отыр. Ағымдағы жылдың 3 маусымынан бастап жолаушыларға ыңғайлы болуы үшін Шымкент станциясынан Сарыағаш курорттық аймағына дейін автобустармен трансфер ұйымдастыру бойынша қосымша қызмет көрсетілетін болады. Ол үшін жолаушы Шымкент және Сарыағаш қалаларындағы автобусқа отыру кезінде жүргізушіге қағаз түріндегі немесе электрондық нұсқадағы теміржол билетін көрсетуі тиіс. «Жолаушылар тасымалы» АҚ логотипі бар автобустар Шымкент теміржол вокзалының тұрақ аймағында және Сарыағаш курорттық аймағында жолаушыларды күтетін болады. Жол жүру құны – бір бағытқа 1800 теңге. 7 жасқа дейінгі балаларға тегін. Қосымша қызмет жолаушы маусымы жанданатын жаз мезгілінде еліміздің түкпір-түкпірінен курортты аймаққа ағылатын халық үшін тиімді екені сөзсіз. Сондықтан ол көпшіліктің көңілінен шығады деген сенім бар. Қандай да бір сұрақтар туындаған жағдайда жолаушылар «105» анықтама қызметіне хабарласуларына, ал қызметтер сапасы мәселелері бойынша бірыңғай тәулік бойы жұмыс істейтін «1433» байланыс орталығына қоңырау шалуларына болады.