Билет құны қымбаттамайды
Абай облысы бойынша меншікті тілші
Алакөлге баратын туристердің діттеген жеріне кедергісіз жетулері үшін «Жалаңашкөл» станциясына дейін қатынайтын теміржол вагондарының саны көбейтілетінін осыған дейін айтқан болатынбыз. Алайда Шығыс Қазақстан облысы әкімдігінің ҚР Индустрия және инфрақұрылымдық даму министрлігімен бірлесе отырып, қосымша пойыздар шығару туралы өтініші де оң шешілді. Ендігі аралықта Алакөлге Нұр-Сұлтан, Алматы, Өскемен және Семей қалаларынан төрт бағыт бойынша пойыздар қатынайды. Бұған дейін Алматы қаласынан тұрақты түрде жұп күндері 352 орындық 8 вагон қатынап келген болатын. Ал биыл 18 маусымнан бастап «Алматы-Достық» бағытында аптасына үш рет жүретін, 560 орындық 10 вагондық жаңа тағы бір пойыз іске қосылады. Осы күннен бастап «Тұран экспресс» жеке тасымалдаушысы аталған бағыт бойынша 11 вагоны бар 504 орындық тағы бір пойызды жолға шығарады. Сөйтіп, Алакөлге қатынайтын вагондардың жалпы саны 29-ға жететін болды. Сонымен қатар, Семей және Өскемен-1 станцияларынан жазғы кезеңде облыстық бюджеттен субсидияланатын екі пойыз, тиісінше 416 және 364 орындық 8 және 7 вагон жұмыс істейді. Бұған дейін мұнда 260 орындық бес вагон болған еді. «Қала маңы тасымалдары» АҚ-мен жүргізілген келіссөздерден кейін вагон санын 15-ке дейін арттыру туралы келісімге қол жеткізілді. Жолаушылар билетінің құны былтырғы деңгейінде 3780 теңге көлемінде қалатын болды. Сонымен, Нұр-Сұлтан, Алматы, Өскемен және Семей қалаларынан қатынайтын вагондардың жалпы саны 68 болады. Сондай-ақ биыл автобустар саны да екі есеге дейін артып, облыстың екі қаласынан күн сайын 768 орындық 16 автобус қатынайды.