Сарыла күткен Атырау - Д. Нұрпейісова бағытындағы пойыз тамыздан бастап жүре бастайды

Атырау облысының Құрманғазы ауданына пойыз жүргізу мәселесі облыстық мәслихатта қаралып, мақұлданған болатын, деп хабарлайды Rail-news.kz. Соған сәйкес 13 шілдеде облысішілік Атырау – Д.Нұрпейісова станциясы бағыты бойынша теміржол тасымалдаушысын анықтау мақсатында ашық конкурс туралы хабарландыру жарияланды.

«Қатысуға ниет білдірген 5 мекемеден құжаттар қабылданды. Конкурс комиссиясының отырысы өтті, жеңімпаз 15 күн ішінде анықталады, содан кейін онымен және Жолаушылар тасымалы және автомобиль жолдары басқармасы арасында келісім жасалады», – деп хабарлайды облыстық әкімдіктің баспасөз қызметі.

Жолаушылар пойызын іске қосу тамыз айына жоспарланған. Қазіргі таңда пойыз эксперименталды кезеңнен толық өткен. Атырау магистральдық желі бөлімшесінің директоры Елеубай Сапаровтың айтуынша, Атырау облыстық әкімдігі және «Қазақстан темір жолы» компаниясының бастамасымен іске қосылған жоба бойынша Құрманғазы, Исатай аудандарының мәслихат депутаттарымен пойыз кестесі де келісілген. Пойыз Атырау станциясынан 18:00 сағатта шығып, Дина Нұрпейсова станциясына 01:00-де жетеді. Яғни, аралық жүру уақыты 7 сағат. Ал кейін қарай түнгі 02:00-де шығып, таңғы 09:00-де Атырау станциясына келеді. Пойыз жолдағы барлық станциялар мен разъездерге тоқтайды. Жол жүру ақысы: плацкарт вагон Аққыстау станциясына дейін – 218 теңге, Исатай станциясына – 464, ал ақырғы Д.Нұрпейсова станциясына 1200 теңге шамасында болмақ. Пойыз құрамында 1 плацкарт, екі жалпы вагон болады, ол күн сайын қатынайды.