Індетке байланысты жолаушы пойыздарынан «жалпы» вагондар алынып тасталады

ҚР Бас санитар дәрігері Ерлан Қиясовтың жаңа қаулысы бойынша жолаушы пойыздарынан «жалпы» вагондар алынып тасталады, деп хабарлайды Rail-news.kz. «Қазақстан темір жолы» ҰК» АҚ жолаушылар пойыздарының құрамында жалпы вагондарды жасақтауды болдырмасын» деп жазылған жаңа қаулыда. Сондай-ақ құжат бойынша облыстарда, Алматы, Нұр-Сұлтан, Шымкент қалаларында осы қаулымен бірге берілген №1 және №2 қосымшалардағы тізімге енбеген объектілердің қызметін де қайта бастау тапсырылған.

«Облыстардың, Алматы, Нұр-Сұлтан, Шымкент қалаларының, көліктегі Бас мемлекеттік санитариялық дәрігерлер, Қорғаныс министрлігінің, ұлттық қауіпсіздік және ішкі істер органдарының, ҚР Президенті Іс Басқармасы ведомстволарының халықтың санитариялық-эпидемиологиялық саламаттылығы саласындағы қызметті жүзеге асыратын құрылымдық бөлімшелерінің басшылары қалыптасқан эпидемиологиялық жағдайға байланысты, тәуекелі жоғары аймақта (қызыл аймақ) орналасқан карантиндік шараларды қатаңдату туралы шешім қабылдауға құқылы» делінген қаулыда.

Ал облыстардың, Нұр-Сұлтан, Алматы, Шымкент қалаларының бас мемлекеттік санитар дәрігерлеріне «жасыл» және «сары» аймақтарда орналасқан өңірлерде карантиндік шараларды қатаңдату туралы шешім қабылдау құқығы берілмейтін болды. Қаулы 13 қыркүйекте сағат 00.00-де күшіне енді.