Тәуелсіздік алған жылы туған шымкенттік теміржолшы кәсібін мақтан тұтады

Біздің кейіпкеріміз Гаухар Борықбаева – Шымкент белгі беру және байланыс дистанциясында электромеханик болып жұмыс істейді. Ол Қазақ елі тәуелсіздік алған жылы дүниеге келгенін бағы деп біледі.

– Мен жалпы патриотпын, «Менің Қазақстаным» Әнұранын немесе «Мен қазақпын» деген әнді тыңдасам, толқып көзіме жас келеді. Қазақстанымды әлемнің ешбір еліне айырбастамаймын, «Әркімнің туған жері – Мысыр шаһары» дейді ғой, дегенмен біздің елге, оның ішінде өзім туып-өскен оңтүстікке жер жетпейді. Бала-шағамның да осы елде өсіп-өнгенін қалаймын, – деп сыр шертті Гаухар.

Ол теміржол саласын, оның ішінде электромеханик мамандығын неге таңдағанын да айта кетті. Айтуынша, мамандықты таңдау үшін, адам ең алдымен өзін, өз бейімін тануы қажет.

– Мамандық таңдауда әр адам өзінің қызығушылығына, қабілетіне, бейімділігіне, қалауына сүйенуі керек деп ойлаймын. Әкем Бағлан Аңсабекұлы Шымкент магистральдық желі бөлімшесінде еңбек етеді. Теміржолшы кәсібін таңдауыма әке ықпалы болған шығар, мектепте математика-физиканы жақсы оқыдым, сосын байланыс жүйесі, электромеханиканы таңдадым, жалпы кәсіп таңдауда қателеспеген жанмын», – дейді ол.

Гаухар жуырда «Желтоқсан оқиғасы – Тәуелсіздік бастауы» деректі фильмін көріп, қатты әсерленгенін әңгімелеп берді. Қазақ халқының батыр ұл- қыздарының ерлігіне бас иіп, ондай жанкешті батылдықты тек еркіндік пен егемендікті шын жүрегімен аңсаған халықтың ұрпағы ғана жасай алады деп ой қорытқанын айтты. «Ұлы даланың қарыс жерін қорғау үшін төгілген қан мен тердің өтеуі, бабалар арманы, аманаты – Тәуелсіздігіміз баянды болсыншы» деп шын тілегін жеткізді.