Арыстық теміржолшылар әулетінің кейінгі буыны атакәсіпті лайықты жалғастырып келеді

Тәуелсіздік жылы дүниеге келген тағы бір теміржолшы – Арыс белгі беру және байланыс дистанциясының бас инженері Мейіржан Жаңабаев. Жалпы еңбек өтілі 500 жылдан асатын атақты династиядан шыққан жас «теміржолшы – біздің атакәсібіміз» дейді мақтанышпен.

Мейіржанның отбасыңда үлкен қуаныш. Өзі Тәуелсіздік алған жылы дүние есігін ашса, оның отыз жылдығында Айбарыс есімді ұлды болды. «Ұлымның есімін Қазақстан Орта Азияның барысына айналсын деп ырымдап өзім қойдым» дейді қуанышымен бөліскен жас әке.

«Қазақ халқының басынан не өтпеді? «Ақтабан шұбырынды, Алқакөл сұлама», жоңғар шапқыншылығы кезіндегі тоз-тозды айтпағанда өткен ғасырдағы ұлы жұт, сұмдық ашаршылық, қуғын-сүргін, соғыс ұлтымызды жер бетінен жойып жіберуге шақ қалған жоқ па? Сондықтан, біздің мақсатымыз – көбею. Отыз миллионға жетсек деп армандаймын», – дейді Айбарыс ұлдың әкесі.

Мектеп бітірген соң көлік академиясын бітіріп осы салада еңбек етіп келе жатқанына 10 жылдан асқан жастың арманы отандық теміржол саласының дамуы мен өркендеуіне үлес қосып, өзіндік қолтаңбасын қалдыру. Өмірлік ұстанымы: «Бір сағат кем ұйықтасаң, бір сағат артық еңбек етесің». Арыстан шыққан атақты теміржолшы-жерлестері, Социалистік Еңбек Ері Әуезхан Салықбаев пен Сырлыбек Байжановты үлгі тұтады. Хоббиі – футбол, сүйікті сериалы – «Тақтар таласы». Бас инженер мекемеде еңбек қауіпсіздігінің сақталуы мен техникалық аппараттардың мүлтіксіз жұмыс істеуін қадағалап, жаңа заманға сай микропроцессорлық қондыр- ғыны енгізуде бар күш-жігері мен білімін жұмсап еңбектенуде. «Үздік маман» атануы да тынымсыз адал еңбегінің нәтижесі екені анық. Мейіржан тәуелсіз елдің кез келген азаматы азаттықты бағалайтынына сенімді.