Маңғыстау теміржолының ардагері Қожахмет Уәзір тәуелсіздік күнімен құттықтады

Қожахмет Уәзір, Маңғыстау теміржолының ардагері  - Биыл тәуелсіздігіміздің отыз жылдығы. Біз бұл күндерге оңайлықпен жеткен жоқпыз. Егемендік алған жылдары Маңғыстау жол дистанциясын басқардым.  Алғашқы жылдары ел қатары барлық қиыншылықтар теміржолшылардың да басынан өтті. Ақшаның тез құнсыздануы, ұжымшарлар тарап кетуі халықтың тұрмысына қатты әсер етті. Жұмысшылар уақытылы айлық еңбекақысын ала алмады. 5-6 айлап жалақыға қарыздар болдық. Ақшаның орнына заттай есептесуге тура келді. Дегенмен  теміржолдың артықшылығы дейміз бе, онда еңбек етіп, жол бойында тұратын халықтың жағдайы өзгелерден тәуір  еді. Сондықтан да жұмыссыз қалғандардың көбі бізге келетін. Теміржолшыларда айлық табыстан бөлек көбінде мал шаруашылығы да болатын. Теміржол сол жағынан қолдады. Жем-шөпті өте арзан бағамен жеткізіп беріп отырдық. Ол да көмек. Халық ет, сүт, шұбат, жұмыртқа дегендей басқа да өнімдерін жолдан өткендерге сатып, өзге тамаққа айырбастайтын. Осылай күн көрген қарапайым халық... Отыз жылдың ішінде Маңғыстау теміржолы үлкен табыстарға жетті. Бейнеуден бастап Маңғыстауға дейін теміржолды күрделі жөндеуден өткіздік. Жаңадан станция, бекеттер, көпір, су өткізгіштер, тұрғын үйлер салдық. Көп өзгерістер болды. Түбек теміржолы бұрын тек Өзен станциясына дейін келетін тұйық жол еді. Өзеннен Түркіменстанға жаңа жол тартылып, өрісі кеңи түсті. Бейнеуден Шалқарға жол ашылды.  Ақтауға қосымша Құрық порты салынды.  Солардың арқасында қаншама жұмыс орындары құрылды, жаңа елдімекендер пайда болды. Тәуелсіздікке дейін-ақ, тоқсаныншы жылдары жолдарымыздың жағдайы нашар, тозығы жетіп, жарамсыз күйге келіп қалғанды. Жоғары жағында жеңіл рельстер салынған. Онымен пойызға жоғары жылдамдық беріп, үлкен ауыр құрамдар  жүргізу қауіпті еді. Сондықтан Тәуелсіздіктен кейін 2000 жылға дейін біраз бөлігіне күрделі жөндеулер жүргіздік. Р43 рельстерін Р65 түріне ауыстырдық. Ағаш шпалдың орнына бетон шпалдар қойдық. Бірнеше бекет бой көтерді. Оған дейін бекеттер арасы 40-50 шақырымнан еді. 20-25 шақырым сайын бекеттер ашылды. Бейнеуден бастап Маңғыстау станциясына шейін 404 шақырымның ортасында үлкен станцияларымыз Сай-Өтес, Шетпе, Маңғыстаудың аралығында  16 бекет болатын. Арасы қашық болғасын Маңғыстаудан бастап Тамақ, Маната сияқты бірнеше бекет ашылды. Сай- Өтес станциясымен 9-бекет ортасында пойыздар тоқтаусыз қатынауы үшін қос жолды телімдер  салынды. Бекеттердің, станциялардың қосымша жолдары, мысалы Шетпе, Сай-Өтес, Маңғыстау, Бейнеу станцияларының басына бірнеше құрамды қатар  қабылдай алатындай жаңа жолдар тартылды. Қысқасы Маңғыстау теміржолы тәуелсіздік жылдары  тоғыз жолдың торабына айналды.  2009 жылғы дейін Маңғыстау жол дистанциясын басқарсам,  Маңғыстауда магистральдық желі қосалқы бөлімшесі ашылғасын оны басқарған мен осы жұмыстардың бел ортасында жүріп, егемен еліміздің дамуына өз үлесімді қосқанымды мақтаныш етемін. Тәуелсіздігіміз мәңгі баянды болсын!