Жалғызтөбелік электромеханик жаңа технологиялардың батыл енгізілгенін қалайды
Абай облысы бойынша меншікті тілші
Аягөз белгі беру және байланыс дистанциясының Жаңғызтөбе станциясындағы тәжірибелі электромеханигі Нұрлыбек Мурсакимов жаңа технологияларды меңгеру – уақыт талабы, сондықтан оларды өндіріске батыл енгізетін кез келді деп санайды.
Бүгінде Айдос Жұлдызбаев жетекшілік ететін Аягөз белгі беру және байланыс дистанциясында жаңа технологиялардың қолданылу аясы кеңейе түскен. Ақтоғай станциясынан бастап, Аягөз-Жарма-Шар телімдері арасында жаңартылған қондырғылар қолданысқа беріліп, бұл станциялардағы электромеханиктер жұмысына зор жауапкершілік жүктеп отыр. Нұрлыбек Мурсакимов – станцияға 1985 жылы қызметке келгеннен бері тапжылмай еңбектеніп келе жатқан тәжірибелі электормеханик. Бүгінде өзінің шәкірті Ерлан Мамырбаев екеуі аталмыш станциядағы қозғалыс саласындағы барлық жұмысқа жауапты.
– Осы жылдар аралығында теміржол саласындағы барлық өзгерістерді, жетістіктерді көзбен көріп, бірге өткеріп келеміз. Біздің салада 2018 жылдан бастап үлкен өзгерістер басталды. Жаңадан орнатылған оптикалық-талшықты кабельдер және МС-04 PCL сандық құрылғыларын қолдану сияқты шаралар жұмыстың жүйелі жүргізілуіне оң жағдай жасады. Техникалық құрылғыларды жаңалау мақсатында қолға алынған жұмыстарды аз уақыт ішінде аяқтап шыға алдық, – дейді Нұрлыбек Жұмабекұлы.
Дистанция бойынша желі бойындағы байланыс құрылғыларын монтаждау жұмыстарына да айрықша белсенділікпен қатысып жүрген ол осы жұмыстардың сыртында инженерлік-техникалық іс-шаралардың да өз деңгейінде жүзеге асырылуына кәсіби маман ретінде атсалысыпты. Осы ретте СЦБ-ның жекелеген бөлшектерін қайта жаңарту желі бойындағы жұмысты біршама жеңілдеткен. Алайда, осы жұмыстар аясында жаңаша жұмыс жүргізу байырғы байланысшылар үшін оңай шаруа емес. Ал Нұрлыбек Жұмабекұлы елорда төрінде екі айлық біліктілік шыңдау курсынан өтіп келіпті. Қазіргі уақытта технологиялық процестердің кестесін әзірлеп, жұмыс барысын жаңғырту жұмыстарына бейімдеумен қатар әріптестеріне жаңа технологиялар тілін меңгеруге хал-қадірінше көмектеседі.
– Жалпы, Жаңғызтөбе – қозғалыс жиілігі аса жоғары станция. Сондықтан, байланыс саласындағы жүргізілген жаңарту жұмыстарының тиімділігі мол екеніне көз жеткізуге болады. Бұл орайда Нұрлыбек Жұмабекұлының білімі мен тәжірибесі бізге үлкен көмек, үлесі қомақты, – деп пікір білдірді Жаңғызтөбе станциясының бастығы Азамат Нұрғалиев.
Мол тәжірибе дегеннен шығады. Жаңғызтөбелік байланысшы жуырда 60 жасқа толған болатын. Жармалық теміржолшы құрметіне станция басында жиын өткізіліп, оның еңбек жолына, қызметтегі тағылымы жайында келелі сөз қозғалды. Міне, осы орайда Аягөз белгі беру және байланыс дистанциясының байланыс жөніндегі орынбасары Нұрлан Сыдырманов Нұрлыбек Жұмабекұлының бай тәжірибесі мен байыпты қызметін баса атап өте келе, Жарма өңіріндегі байланыс саласын дамытудағы зор жетістіктері мен қажырлы еңбегін аса жоғары бағалайтынын да жеткізді. Бүгінгі күні Нұрлыбек Мурсакимов бастаған байланыс саласының мамандары желі бойында қозғалыс қауіпсіздігін қамтамасыз ету жолындағы қызметтерін абыроймен жалғастыруда.