Ақтөбелік теміржолшы-блогер өз саласының тіршілігін насихаттап жүр
Ақтөбе облысы бойынша меншікті тілші
Ұлттық компания қызметкерлері арасында танымал блогерлер жоқ емес. Батыс аймақтық жолаушылар тасымалы филиалының жолсерігі Қуаныш Жеткергенов әлеуметтік желі қолданушыларының арасында танымалдыққа ие болып, интернет тұтынушыларына сапалы контент ұсынып жүр.
Қуаныш Ақтөбенің Шалқар ауданының тумасы. 27 жаста. 2017 жылдан бері теміржолда еңбек етеді. «Ақтөбе – Астана» бағытындағы Тұлпар-Тальго пойызының жолсерігі. Қуаныштың басқа жолсеріктерден ерекшелігі – әлеуметтік желіні еркін қолданады. Елімізде ерекше трендке айналған әлеуметтік желі Тik-Tok арқылы теміржол тынысын көрсетіп, жолсеріктер жұмысымен таныстырып отырады.
«Әлеуметтік желіні мотивация құралы ретінде пайдалануға болатынын түсіндім. Неге өзімнің салама қатысты қызықты видео түсірмеске деген ой келді. Ұзақ ойланып, тек биыл қолға алдым. Бір жылдан бері желіде белсендімін. Оқырмандарым тек теміржолшылар емес», – дейді жолсерік Қуаныш Жеткергенов.
Желі статистикасындағы ақпаратқа сүйенсек, теміржолшы жігіттің оқырмандары әр қалада бар екенін көруге болады. Әсіресе, Шымкент, Нұр-Сұлтан, Ақтөбе қалаларынан қаралым көп.
«Қазір әлеуметтік желі дамыған заман. Іnstagram арқылы Reels түсіремін, Tik-Tok желісін белсенді қолданамын. Ел экономикасының драйвері саналатын теміржол саласы қиындығы да қызығы да бар күрделі сала. Сапар шегіп, жолаушылармен жұмыс істеген ұнайды. Әлеуметтік желі қолданушылары да халық, біздің жолаушылар. Сондықтан соңғы жылдары трендке айналған желілерді еркін пайдалану, теміржол саласын көрсету, барынша шынайы болуды таңдадым. Кейде жолаушылар танып жатады. «Instagramдағы бала» деп бір-бірімізге жақсы көңіл күй сыйлап жатамыз», – деп күледі теміржолшы-блогер.
Тik-tok, Instagram – қазір барлық елде танымал, ең жылдам дамып келе жатқан және ең көп жүктелген әлеуметтік желілердің бірі. Олардың мобильді қосымшасы арқылы видеоның фондағы музыкасын тездетуге, баяулатуға және түрлі фильтрмен өңдеуге болады. Теміржолшы жігіт осы ерекшеліктерді меңгеріп алған. Танымал әндерді синхрондап, теміржол бойынан қысқа бейнелер түсіреді. Видеоны жүктеп, басқа әлеуметтік желілерде бөліседі.
Ол адамдардың ойына теміржол туралы жақсы әсер сыйлағысы келеді. Түсірілімдердің көпшілігі теміржол бойында, сапар барысында жасалған.
«Өзімде бұрын 5 мың оқырман болды. Негізгі видеоны Reels арқылы жүктеп отырдым. Оқырмандарымның көпшілігі сол жердегі қаралым арқылы келді. Қазіргі оқырмандарым 2-3 айда жиналды. Дайрект арқылы Reels видеоларын жіберіп, осылай түсірші деген ұсыныс айтатындар бар. Видеоға түсіріп қойған идеяларым бар. Бірақ оның уақытын күтемін. Әр нәрсені уақытында ұсынған жақсы. Себебі талғамы биік оқырман сапалы, қызықты контент күтеді», – дейді Қуаныш Нұрболатұлы.