Ардагер ананы әріптестері құттықтады

Тағдырын теміржолмен байланыстырған жандардың бірі – қызылордалық Назымхан апа. Күні кеше жетпіс жасқа толған ардагерді әріптестері құттықтап, құрмет көрсетті.

Теміржол саласының дамуына тұп-тура қырық жыл үлес қосқан Назымхан Оразбаева еңбек жолын тауар кеңсесінен бастапты. Мектеп бітірісімен бірден жүк және багаж қабылдап-тапсырушы болып жұмыс істеуге кірісіпті. 40 жыл бір орында тапжылмай еңбек етіп, сол қызметтен зейнетке шыққан. Станциялықтар қарапайым қазақ әйелінің кәсіпке деген адалдығы мен жауапкершілігін әрдайым жастарға үлгі етіп айтып отырады.  

Қызылорда қосалқы бөлімі кәсіподақ ұйымының төрағасы Мұхтар Көпірбаев, ардагерлер кеңесінің өкілі Ахмедияр Пірімбетов және «Аманат» партиясы «Теміржол» филиалының атқарушы хатшысы Базара Танбаева Назымхан апаның шаңырағына арнайы барып, ардагерді мерейлі жасымен құттықтады.

– Дүниеге 5 бала әкелдім, жолдасымның денсаулығы сыр беріп, ауру-сырқаулы болды. 15 жылдан аса пәтерден-пәтерге көшіп жүріп жұмыс істедік. Жолдасым өмірден озды. Балаларымды жетілдіру үшін жұмыстан қалмай, ретсіз сұранбай, абыроймен атқаруға күш салдым. Одан жаман болған жоқпын, шүкір, соның арқасында еңбегім бағаланып, марапат та алдым, теміржолдан 4 бөлмелі үй де алдым. Өмірге де, теміржолға да өкпем жоқ. Қазір 14 немерем, 3 шөберем бар, ең бай әжемін, – деп тағдырына ризашылық білдірді ардагер ана.  

Мерейтой иесіне партия мен ардагерлер кеңесі атынан алғыс хат тапсырылып, кәсіподақ ұйымы атынан сый-сияпат жасалды.