«Агент Сапина»

Қатаң тәртіпке бағынған теміржол саласында еселі еңбек етіп жүрген нәзік жан иелері баршылық. Жұмагүл Сапина – солардың бірі. Қандыағаш станциясында жүктерді іздестіру, коммерциялық актілерді тіркеу бөлімінің іздеу агенті болып еңбек ететін тәжірибелі теміржолшының жанама аты – «Агент Сапина».

Кейіпкеріміздің бұл мамандықты игергеніне 30 жылға жуықтаған. Жұмыс өте жауапты. Тосыннан болатын қауіптің алдын алу, қадағалаудан бөлек, ұрлық, құжат жоғалу, тағы басқа заңсыздықтармен күресу оңай емес. Жүк вагондарына қатысты түрлі қауіпті жағдайлар, заңсыздық, бөтеннің мүлкін иемдену секілді келеңсіздіктер тіркелсе, агент Сапинаның тәулік бойы тынымсыз жұмыс істеуіне тура келеді.  

«Таңғы сағат 6-да жұмыста боламын. Бізде мереке, демалыс күні деген болмайды, келеңсіз оқиға тіркелсе, кез-келген сәтте жұмыста болуға тиіссің. Күндіз-түні тоқтаусыз қозғалыс жүріп жатқан сала болғандықтан жұмысымыз да үзіліссіз», – дейді Жұмагүл Сапина.  

Мектеп бітіріп, жаңа өмірге қадам басқан жас қыз еңбек жолын қатардағы қарапайым жұмысшы болып осы Қандыағаш станциясында бастаған екен. Бір жылдан соң арнайы жолдамамен жоғары оқу орнына түсіп, дипломмен қайта оралған. 1984 жылдан бастап нағыз теміржолшы ретінде қалыптаса бастайды. Алдымен құжат жеткізуші, техникалық кеңсе операторы болды. 1992 жылы станциядағы жүктерді тіркеу, іздестіру бөліміне ауысады. Бүгінде осы Қандыағаш станциясының жүктерді іздестіру, коммерциялық актілерді тіркеу бөлімінің іздеу агенті.  

Кейіпкеріміз теміржолшылар әулетінде тәрбие алған. Атақты династиялардың бірі Жұбанышевтар әулеті 2017 жылы ел бойынша мерейлі отбасы байқауында бас жүлдені жеңіп алған. Отбасында тәрбиеленген жеті бала да теміржол саласында еңбек етеді.  

«Теміржол саласы қиын әрі жауапты. Күніге мыңдаған тонна жүк, жүздеген жолаушы тасымалын жүзеге асырып жатқан алып сала бейне бір конвейер секілді. Онымен бірге қозғаласың, түсіп қалу – апат деген сөз. Сондықтан қателесуге қақымыз жоқ», – дейді агент Сапина.