Азамат Нұрғалиев үздік теміржолшы атанды
Абай облысы бойынша меншікті тілші
Жарма өңірінің теміржол тарихы Түрксібпен тамырлас. Бұл аймақтан шыққан атақты теміржолшылар қатары да мол. Бүгінгі таңда кешегі аталар дәстүрін қайта жаңғыртып, теміржолшылар мен даңқты династия өкілдерінің мәртебесін биіктетіп жүрген жармалықтар аз емес.
Жергілікті атқарушы биліктің шешімімен өңір бойынша жылдың үздіктері қатарына теміржолшылар өкілі де енгізіліпті. Жуырда ғана болып өткен аймақтық байқау бойынша Жаңғызтөбе станциясының бастығы Азамат Нұрғалиев «Жылдың үздік теміржолшысы-2022» номинациясы бойынша марапатқа ие болды.
Азамат Қанапияұлы кездейсоқ таңдалмаған. Жарма өңіріне әйгілі Нұрғалиевтар династиясының ең кіші буыны аймақтың әлеуметтік-экономикалық дамуына елеулі үлес қосып жүрген ел азаматы ретінде танылып отыр. Атқарушы билік өкілдері оның Түрксіб заманында салынған Жаңғызтөбе станциясын күрделі жөндеуден өткізіп, соңғы екі-үш жылдың көлемінде жүк айналымын бірнеше есеге арттыру жолындағы еңбегін аса жоғары бағалапты. Мәселен, Жаңғызтөбе арқылы 2016 жылы небары 296 вагонға жүк тиелсе, өткен жылы 7 200 вагон жөнелтілді. Ал биылғы жылы жүк тиеліп жөнелтілген вагондар саны 8 000-ға жақындаған.
Жаңғызтөбе станциясының бастығы Азамат Нұрғалиев сонымен қатар жүк тиеу мен түсіру жұмыстарының артуына байланысты өткен ғасырдың 90-шы жылдары жабылып қалған кірме жолдарды қайта ашып, жандандырып жатқан көрінеді. Өңір басшысы Жарқынбек Борашев «Жылдың үздік теміржолшысы» атанған Азамат Қанапияұлын марапаттап, барлық теміржолшылар қауымына Жарма өңірінің әлеуметтік-экономикалық дамуына қосқан үлестері үшін жергілікті атқарушы билік атынан зор алғыс білдірді.