Миллионер машинист

Қарбыз өсіріп, бір жылда 25 млн теңге табыс тапқан теміржолшыға қызыға қарайтындар көп. Шұбарқұдық станциясының машинисі Жәнібек Елтезеров туралы кеңірек әңгіме қозғағанды жөн көрдік.    

Отыз алты жастағы Жәнібек Елтезеровтің отбасында бес бала өсіп келеді.  Сондықтан бір ғана жалақыға қарап отырмай, қосымша табыс табуды ойлаған машинист жігіт жермен айналысуды жөн көреді. Соңғы үш жылдан бері жер жыртып, бау-бақша егіп отыр. Екі бірдей жоғары білімі бар жігіттің ауыл шаруашылығынан хабары мол, диқаншылықтың пайдасын жақсы біледі.  

«Ата кәсібіміз емес пе, жермен жұмыс істеген өзіме ұнайды. Терапия. Жерді  дұрыс күтіп баптасаң, бәрін өсіріп өндіруге болады. Мал өсірсең өсімін алу үшін талай жыл кетеді, ал диқаншылық бір жылда байытады деген ата бабамыз. Былтыр бұл іске 10 млн теңге салдым, тек қарбыздан 25 млн теңге таптым. Көкөністерді де өсіремін. Ата-анам, жұбайым көмектеседі. Ауыл-аймақ, төңіректі тұтастай қарбызбен қамтамасыз етіп отырмын. Жаман емес. Пайдасы бар. Егер сіз қол қусырып жатпай, еңбек етсеңіз, міндетті түрде жетістікке қол жеткізесіз», – дейді Жәнібек Елтезеров.  

Теміржолшы жігіт алғашқыда картоп өсіріп бастағанын айтады. Кейін егіс алқабын ұлғайтып, сегіз гектарға қарбыз еккен. Ісі өрге басқан көпбалалы әке кәсіби бағбандардан көп нәрсе үйреніп, жылдан-жылға шыңдала түскен. Тәжірибелі  шаруалардан жер баптаудың қыр-сырын үйреніп, қарбыздың ерте пісетін сұрпын да зерттеп үлгерген. Қазір пленка астына дақыл салып, нарыққа ерте шығаруды жоспарлап отыр.  

«Басқалардың бақшасы піскенін қарап отырғаннан өзің еккен дәмдірек. Одан пайда тауып отырсаң жақсы емес пе?! Жер бар, су бар. Басқаға тәуелді қылмай жерлестерімді қарбызға тойдырамын. Биыл ең кемі 700-800 тонна қарбыз аламын деген жоспар бар. Қарбыздан бөлек басқа да көкөністер ектім, бәрі табиғи өнім, өзіміз жейміз, артылғанын сатамыз», – деді ол.  

Көп балалы әке биыл егіс алқабын үш есеге ұлғайтуға ниетті. Бұдан басқа, жылыжай салуды жоспарлап отыр. Айтуынша, бүгінде көмекшілері көбейген, сондықтан негізгі жұмысына еш кедергі жоқ. Жұмыстан қалған емес, уақытылы демалып, дайындалып, кесте бойынша темір тұлпарымен сапарға шығады.