Адал еңбек өтеуі – алғыс
Түркістан облысы бойынша меншікті тілші
ТЧЭ-33 Түркістан локомотив пайдалану депосы жөндеу және қадағалау бөлімінің инженері Сарыбай Мыңжанов теміржолшы әулетінің өкілі болған соң, кәсібіне берілген жан.
Теміржолдағы еңбек жолын 1980 жылы мектеп бітірген соң депода слесарь болып бастаған Сарыбай Өмірзақұлы машинист көмекшісі, тепловоз машинисі, инженер-технолог, жөндеу цехында аға шебер, бас инженер, депо бастығына дейінгі жолдан өтті. 1988- 1994 жылдары Алматы теміржол институтында өндірістен қол үзбей оқып, инженер-механик мамандығы бойынша жоғары білім алды.
Міне, 41 жыл өмірін теміржолға арнап, бүгінде өз кәсібінің майталман маманы атанып отырған жан алпыстың асқарына шығып отыр.
– Еңбек еткен елеусіз қалмайды, ақ-адал еңбектің өтеуі бар, материалдық игілігін көресің. Одан бөлек, алғыс алып, абыройға кенеліп жатсаң, мерейің өседі, – дейді жуырда «Адал еңбегі үшін» медалімен марапатталған кейіпкеріміз.
Сарыбай Өмірзақұлы жары Шерубаева Қарлығашпен екеуі 2 ұл және 1 қызды өсіріп жеткізіп, 6 немереге ата-әже болып отырған бақытты жандар. Тұңғыштары Мақсат Түркістан облысының Ішкі істер саласында қызмет атқарса, қыздары Ақерке Түркістан қаласында мектеп мұғалімі. Кіші ұлдары Наурызбай Яссауи атындағы Қазақ-Түрік университетінің магистранты.
Түркістан локомотив пайдалану депосы жөндеу бөлімінің басшысы Исабеков Бауыржан әріптесінің әсіресе, жас мамандарды тәрбиелеудегі қабілетін айрықша жоғары бағалайтынын жеткізді. Бүгінде ел ағасы жасына жетіп отырған теміржолшының жауапкершілікті жоғары қоятын қасиеті барша әріптестерін тәнті етеді екен.