Мақаттан басталған мақсатты жол

«ҚТЖ» ҰК» АҚ Техникалық саясат департаментінің бас менеджері Рашид Нұртазаевтың теміржолдағы еңбек өтілі тұп-тура 40 жылды құрайды. Биыл саладағы ең мәртебелі марапат «Құрметті теміржолшы» белгісін төсіне тағып, еңбек жолын тәмамдамақ.

Ресейде туып-өскен кейіпкеріміз 1983 жылы отбасымен Қазақстанға оралып, Мақат станциясына көшіп келеді. Сол жылы Мақат локомотив пайдалану депосында слесарь болып теміржолдағы еңбек жолын бастайды. Бір-екі жылда машинист көмекшісі болады, тағы үш жылдан кейін машинист болып 1991 жылға дейін локомотив тізгіндейді. Одан әрі 9 жыл машинистнұсқаушы болды. Бос уақытының бәрін оқып, білімін көтеруге жұмсаған мақсатты жан теміржолшы инженер және экономист мамандығын алады. Кейін тағы да білімін жетілдіре түсіп, теміржолдың бухгалтерлік есеп саласын игереді.  

Жаңа мыңжылдық басталған кезде Астанаға шақырту алып, жұмысын «ҚТЖ» РМК локомотив шаруашылығы департаментінде отын-жылу техникалық бөлімінің бас маманы болып жалғастырады. Одан әрі осы бөлім бастығының орынбасары, «Локомотив» АҚ отын-жылу техникалық бөлімі бастығының орынбасары, экономиканы басқару және пайдалану көрсеткіштері бөлімінің бастығы, локомотив бригадалары мен локомотив жұмысын ұйымдастыру бөлімінің бастығы, техникалық даму басқармасының бастығы, «Локомотив» АҚ бас инженері, басқарма басшысы, Бизнесті трансформациялау бағдарламасы бойынша сарапшы, «Деректер архитектурасы» тобының жетекшісі, 2016 жылы Магистральдық желі дирекциясы еңбек қауіпсіздігі және экология департаментінің директоры, өндірістік қауіпсіздік және экология департаментінің бас менеджері қызметтерін атқарады.  

Оның темір жол саласына сіңірген еңбегі ұшан-теңіз. Астана қаласында локомотив құрастыру зауытының құрылысы, оны жобалау жұмыстарына, сол зауытқа персонал іріктеп, дайындау жұмыстарына тікелей араласқан еңбегі бір төбе. Сондай-ақ локомотивтің жаңа дәуірдегі ТЭ33А, ТЭП33А, KZ8A, KZ4AC, KZ4AC, KZ4AT, CKD6E серияларын жасауда қабылдап алу, сынақтан өткізу жұмыстарына қатысты. Сонымен қатар елімізде тәуелсіздік алғаннан кейін салынған жаңа жолдар құрылысы кезінде де өз үлесін қосты.  

– Темір жолға 23 жасымда келдім, Мақатта жүріп алдыма мақсат қойдым. Саладағы қайнаған өмір мен қызу тірлікті жаным қалайтынын түсіндім де білімімді жетілдіріп, шамамның келгенінше биікке ұмтылдым. Өзімді өзім жетілдіріп, көп еңбек еттім, – дейді Рашид Әлиұлы.

Қарым-қабілет, білім мен тәжірибесі бір бөлек, кейіпкеріміздің шектен тыс еңбекқорлығы әріптестерін еріксіз тәнті етеді екен. Бүгінгі таңдағы негізгі міндеті – өндірістік қауіпсіздік мәселесінде әдістемелер әзірлеу, нақтырақ айтқанда арты қайғылы жағдайға алып келген өндірістік оқиғаларды зерттеу, талдау жасау, осы бағытта шетел тәжірибесін енгізу. 2010 жылы «Адал еңбегі үшін», ал 2012 жылы «Үздік рационализатор» белгісімен марапатталған.