Біздің Денис
Қызылорда облысы бойынша меншікті тілші
Қызылорданың солтүстігіндегі Жосалы вокзалына жолы түскен жолаушы риза болып аттанары сөзсіз.
Өйткені мұнда біздің кейіпкеріміз Денис бастаған вокзал қызметкерлері сізді құшақ жая қарсы аларына күмәніңіз болмасын...
Ғасырлық тарихы бар ғимаратқа күніне жүздеген жолаушы келіп-кетіп жатады. Өйткені Жосалы аудан орталығы болған соң мұнда халық та көп. Олардың бәрі елгезек вокзал бастығы Денис Хамовты таниды. Оның аудан көлемінде танымалдығы сол жолаушы халықтың алғысына бөленуінде болып тұр.
Вокзалға жолы түскен жандарды жылы жүзбен қарсы алып, қолайлы жағдай жасау, олардың сұранысын кәсіби деңгейде қамтамасыз етіп, қажет болса вагонға шығарып салу – жосалылықтар үшін қалыпты жағдай. Вокзал жұмысын ұршықтай үйіріп отырған Дениске алғысын жаудырып жатқан жұртты да талай кездестірдік.
Бірде жоғары жақтан Жосалыға тексеруші ревизорлар тобы келеді. «Қош келдіңіздер» деп қазақи қонақжайлықпен қол беріп амандасып қарсы алған вокзал бастығы Денис деп өзін таныстырғанда қазақша судай сапырып тұрған сары балаға таң қалып сұрай бастайды. «Неге атың орысша, Денис... өзің қазақша сөйлеп тұрсың...». «Осы станцияда туғанмын, ұлтым орыс, тілім қазақ, сондықтан Денис болам» деп күледі вокзал бастығы. Оның орыспын дегеніне сенімсіздік танытқандарға төлқұжатын көрсетіп сендіріпті. «Ойпырай, тілің ғана емес, түрің де қазақ қой» депті әлгілер бас шайқап.
– Сырттан келгендер солай таң қалысып жатады, ал жосалылықтар біздің әулетті бес саусақтай таниды, осы ауылдың қазағымыз десек болады, – деп күлді Денис, – Жалпы біздің отбасымыз теміржолшылар әулеті саналады. Анам осы вокзалда қырық жылға жуық жұмыс жасады. Отбасылық тіршілігімізде қазақы дәстүрді ұстанамыз, жұбайым Элмира да жұмысын билет кассирі болудан бастаған қазақ қызы, – дейді «Кәсібі бойынша үздік» атанған Денис Николайұлы.
ҚазАТК түлегі Денис 1978 жылы осы Жосалыда туылыпты. Сондықтан өзі айтқандай аудан орталығында оны танымайтын жан жоқ, және жылы жүзді, мейірімді де қайырымды жігітті бәрі жақсы көреді, «Біздің Денис» деп меншіктеп өзімсіне атайды.
– Аймақтағы теміржол вокзалдарының ішінде Денис Хамов басқаратын Жосалы вокзалының ұжымы өте белсенді және жұмыстары сапалы. Олардың күнделікті жолаушыларға сервистік қызмет көрсетудегі кәсіби біліктілігі, озық тәжірибелерімен әріптестерімізге үлгі, – дейді Қызылорда магистральдық желі бөлімшесі кадр бөлімі басшысы Айдана Нұрмышқызы.
