Вокзалда жарымжан жандарға қол ұшын созып жүрген теміржолшы алғысқа бөленді

Шығыстағы теміржолшылар қауымының арасында өз кәсібі арқылы мүмкіндігі шектеулі жандарға шапағаты тиіп жүрген жандар жетерлік. Қамқорлықты қажет ететін ерекше жандарға әрдайым алдымен қызмет көрсетуге ұмтылатын Семей вокзалының көмекші-кезекшісі Сәуле Суғанова алғысқа бөленді.

Сәуле Абдуллақызын облыстық еңбекпен қамту және әлеуметтік бағдарламалар бөлімінің әкімшілігі арнайы Алғыс хатпен марапаттады. Вокзал қызметкері мүгедектер мен оларды ертіп жүрушілерге пойыз билетін рәсімдеуге зор көмек көрсетіп, мүмкіндігі шектеулі жандардың алғыс-батасына, ілтипатына кенелген.  

Жазғы мезгіл – ерекше жандардың алыс-жақындағы шипажайларға ем қабылдау үшін жол тартатын уақыты. Қашан да қызметі қауырт Семей вокзалында кейбір кездері билет алу былай тұрсын, жолаушылар нөпірі орын алған шақта жарымжан жандарға қозғалудың өзі қиынға соғады. Міне, осындай сәттері Сәуле Абдуллақызы мүгедектер қауымына қол ұшын созып, пойыздағы орнына жайғасқанға дейін бастан-аяқ жәрдем көрсетеді екен. Оның осындай кең пейілі мен елгезектігіне шексіз разы болған жандар өз басшылықтарына осы бір жаны жайсаң вокзал қызметкерін марапаттауды ұсыныпты.

– Бұл – менің міндетім, өз қызметімді қашан да мүлтіксіз атқаруға тиіспін. Жалпы біздің Семей вокзалы кімге болса да лайықты қызмет көрсетуге әрдайым әзір, – дейді Сәуле Абдуллақызы.