Еңбек түбі – зейнет
Тараз қаласы бойынша меншікті тілші
Биылғы Көлік қызметкерлерінің кәсіби мерекесі күні кеудесіне «Құрметті теміржолшы» төсбелгісін қадаған Шөлдала станциясының бастығы Асқарбек Телғараев 18 тамыз күні мерейлі 63 жасқа толып, зейнетке шықты.
Жамбыл бөлімшесінің басшылығы мен әріптестері болат жолда қырық бес жыл тер төккен теміржолшыны зор құрметпен шығарып салды. Т.Рысқұлов ауданы Тасшолақ елді мекенінде дүниеге келген Асқарбек Есбергенұлы біраз жыл көршілес қырғыз теміржолында еңбек етіпті. Бішкек қаласындағы теміржол училищесін бітіріп, 1977 жылы Бішкек станциясына жұмысқа тұрады. Ол жылдары Бішкек жол бөлімшесі Алматы темір жолына қарайтын. Сосын жолдаушы пойызына жолсерік болып ауысып, 2003 жылы елге оралғанға дейін Бішкек станциясында пойыз бастығы, өндірістік оқыту нұсқаушысы, жолаушылар пойызының, қозғалыс қауіпсіздігінің бақылаушысы, Бішкек-1 вокзалының бастығы, бас инженер, Беловодск станцияларының бастығы сынды бірталай қызмет атқарған.
Асқарбек Есбергенұлының елге оралсам деген арманы тек 2003 жылы орындалады. Кейіпкеріміз алдымен Астанада Қырқыншы станциясының бастығы, одан кейін Көкшетауға ауысып, Шагилинка станциясын басқарады. 2019 жылы туған жеріне оралғанға дейін Нұр және Казиевка станцияларына жетекшілік етеді.
Зейнет жасына жақындаған кезде туған жерге ат басын бұрып, Жамбыл бөлімшесі Шөлдала станциясына басшылыққа келеді.
– Болат жолдың бойында өстік. Ол кезде Луговой мен Меркіден Бішкекке пойыздар ағылып жататын. Содан арман қуып Бішкектен бір-ақ шықтым. 26 жылдай көрші елде еңбек еттім. Кешегі демалыс Бішкекке барып келдім, қырғыздық әріптестер де зейнет жасыммен құттықтап шақырған екен. Бірақ Қырғызстанда зейнет жасына қай салада болмасын 40 жыл еңбек етсең болды, шығара береді. Белгіленген жас жоқ, – деп қуанышымен бөлісті кейіпкеріміз.
– Өмір жолыңызға қарасам, негізінен станцияларда басшылықта көп болған екенсіз. Саланың майталманы ретінде айтыңызшы екі елдің теміржол саласында қандай айырмашылық бар екен? – деп сұрадық тәжірибелі теміржолшыдан.
– Айырмашылық өте үлкен. Қазақстанда сала қарқынды дамып жатыр, өндіріске енгізіліп жатқан жаңа технология қозғалыс қауіпсіздігін, техникалық білім мен еңбекті қорғауда тың реформаларға жол ашады, – деп ой бөлісті кейіпкеріміз.
Қырық жылғы еселі еңбегінің жемісін көруге аттанған теміржолшымен ұжымы қимай қоштасты.