Мен алып келген құрамды келіншегім тексереді – теміржолшы
Rail-news.kz Отбасы күніне орай фотожоба өткізіп жатыр. Бүгін еліміздің батысында тұратын теміржолшылар әулеті жайлы баяндаймыз.
Дәулет Толыбаев Маңғыстау пайдалану депосында 2 класты тепловоз машинисті болып жұмыс істейді. Жұбайы Салтанат Абдашева Маңғыстау станциясында жүк қабылдап-тапсырушысы болып еңбек етеді.
Екеуі де осы теміржол саласында танысып, шаңырақ көтерген. Қазіргі таңда 3 бала тәрбиелеп отыр. Бір салада жұмыс істегендіктен бір-бірін барлық жағынан жақсы түсінетіндерін айтады.
«Кейде мен алып келген құрамды келіншегім күтіп алып, тексеріп жатады. Бұл сәтте ол мені күтіп тұрғандай көңілім бір көтеріліп қалады. Жұмысқа жақсы көңіл күймен жіберіп және келгенде жақсы қарсы алып отырады», – дейді Дәулет Толыбаев.
Теміржолшылар әулеті жұмыстан бос уақытын балаларына, отбасына бөлетіндерін айтады.
«Балаларымыз біздің болашағымыз. Бос уақытымызда қосымша оқуларға, жүзуге апарамыз, бірге уақытты қызықты етіп өткізуге тырысамыз», – дейді ол.