Бұқтырма станциясының кезекшісі стандартты емес жағдайда адамдарды құтқарғаны үшін марапатталды
Биыл ҚТЖ адамдарды табиғи апаттарға қарсы күресте және басқа да төтенше жағдайларда құтқару кезінде көрсеткен батылдығы мен ерлігі үшін берілетін «Ерлігі үшін» төсбелгісін тағайындады.
Алғашқы марапатталғандар қатарында Семей жүк тасымалдау бөлімшесі Бұқтырма станциясындағы бағыттамалық бекет кезекшісі Шәріпқан Тоғанбаев бар.
2022 жылдың 25 тамызында теміржолшы стандартты емес жағдайда кәсіпқойлығын танытты. Ол вагондардың жеке кіреберіс жолынан вокзалға қарай жылжып бара жатқандығын байқаған.
Жағдайды дұрыс бағалай отырып, Шәріпқан Тоғанбаев жедел түрде дұрыс шешім қабылдады: бағыттамалы бұрманы ауыстырып, вагондардың маневрлік тепловозбен соқтығысуына және станция қызметкерлерінің басылуына жол бермеді.
Кезекшінің сауатты және шешуші әрекеттері адамдардың өмірі мен денсаулығын сақтап қалды.