Қозғалыс саласының майталманы Төрехан Өтеғалиев 70 жаста

Атырау облысы темір жолында аянбай еңбек етіп, айшықты із қалдырған жандардың бірі Төрехан Өтеғалиевті әріптестері мерейлі 70 жасымен құттықтады.

Бүкіл өмірін темір жолға сарп еткен ардагер 1979 жылы Алматы темір жол көлігі инженерлері институтын темір жолды пайдалану мамандығы бойынша бітіріп, еңбекке араласқан. Еңбек жолын Гурьев станциясында тауар кассирі болып бастаған ол қозғалыс саласының барлық сатысынан өтті: жүк қабылдап-жөнелтуші, станция кезекшісі, кірме жолдар бойынша аға инспектор, станция бастығының жүк жұмысы жөніндегі орынбасары, тағысын тағы қызметтерді абыроймен атқарды.  

Өңірдегі ең ірі деген Махамбет, Ақжайық, Атырау станцияларын басқарды, Атырау жүк тасымалы бөлімшесінде жүк бөлімінің бастығы, кейін бас инженер болды. Қырық жылға жуық еңбек жолында бірде-бір сөгіс алып көрмепті. Әріптестері оны еңбексүйгіш, сауатты, талапшыл, күрмеулі өндірістік оқиғалар кезінде оңтайлы шешім қабылдай алатын қабілетті де іскер жан деп бағалайды. 42 жасында «Құрметті теміржолшы» атанды. Әріптестері мерейтой иесін құттықтап, теміржол саласына сіңірген еңбегі үшін алғыс айтып, зор денсаулық, отбасы амандығын, немере-шөберенің қызығын көруді тіледі.