Жылғаның жол шебері

ҚТЖ келбеті
29.03.2024, 10:57
Суретті түсірген автор
Нұрлыбек Досыбай

Түркістан облысы бойынша меншікті тілші

Арыс жол дистанциясының жол шебері Аманкелді Мүтәліпов Жылға станциясына қарасты 3 306 шақырым мен 3 318 шақырым аралығындағы қос бағытты 24 км жолдың күтіміне жауапты. Сондай-ақ қарамағындағы жолшылармен Жылға станциясы мен оның маңындағы кірме жолдардың да жай-күйін бақылауда ұстайды.

– Мына менің қолымдағы шаблон ертеректе механикалық құрылғы болатын. Қиындығы сол, оны рельс үстіне жатқызған соң жолдың қисық-түзулігін анықтау үшін әлгі шаблонды оңға-солға, жоғары-төмен бұрап көп әуреленетінбіз. Ал қазіргісі өте ыңғайлы. Электронды үлгідегі шаблонды қажет жерге қоясың да экранда көрінген деректерді талапқа сай ма, басқа ма, есеп-қисап жүргізіп, шешім қабылдайсың, – дейді 28 жылдық тәжірибесі бар кәнігі теміржолшы.  

Оның түсіндіруінше, жолшылар шаблонды әр жеті шпалдан соң немесе әрбір 3,5 метр сайын рельс үстіне қойып, тексеріп отыру керек. Олай етпеген жағдайда ауытқушылық назардан тыс қалып, апат орын алуы мүмкін.  

Әр жұмыстың өзіне тән қызығы мен шыжығы болады емес пе?!. Бұл өзі жол жөндеушілер үшін қалыпты жағдай көрінгенімен, жыл мезгіліне орай «рельс физикалық өзгеріске ұшырады» деп оны ауыстырып жатуы қызық көрінеді.  

– Алайда, жазда ұзарып, қыста қысқаруына байланысты маусым сайын тәп-тәуір рельстерді ауыстырып жататын кездеріміз болады. Ал енді оған қатысты есепке алып, әрекет жасамасақ, бағдаршамның белгі беруі тұйықталып, оның соңы апатты жағдайға себеп болуы мүмкін, – дейді жылғалық жол шебері.  

Сондықтан да олар қыс-жаз демей күн сайын 12 метрлік қос рельстің түйіскен тұстағы ашық кеңістіктің 26 миллиметрден артық ұлғайып кетпеуін мұқият қадағалайды. Бір қызығы, қазір дәл осы міндетті мінсіз атқаратын құрылғы әлі шыға қоймаған.  

– Күмәнді тұсты қос жанарымыз ғана анықтайтындықтан, күн ұзаққа жол жағалай жүруімізге тура келеді. Алшақтық байқалған жағдайда арнайы өлшеу құралымен оның анық-қанығына көз жеткіземіз. Қанша жылдан бері істеп келе жатқан жұмысымыз осы болғандықтан, біздің көзіміз аппарат сияқты боп кеткен, – дейді сөз соңын қалжыңға айналдырған Аманкелді.  

Қазіргі кезде Аманкелді Сапарұлы басқаратын жылғалық жолшылар ұжымы 13 адамды құрайды. Күн сайын өздеріне тиесілі учаскені жаяу аралап шығады. Өйткені қажетті құрал-жабдықтармен толыққанды қамтамасыз етілген десек те, адам көзімен көріп, шешім қабылдауды қажет ететін сәттер аз емес. Өздеріне тиесілі учаскемен көп жағдайда жүк тасымалдайтын жылжымалы құрамдар жүретіндіктен көктемгі жауын-шашын кезінде қиыршық тастың топыраққа сіңуі жиілей түседі.  

– Міне, осы кезде қиыршық тастың бетіне лай шығуы салдарынан тегіс әрі түзу жатуы тиіс шпалдар мен рельстер толқындана бастайды. Мұны қандай да бір аппараттың едел-жедел анықтауы екіталай. Тек қиыршық тастың арасы лайлана бастағанын көзбен көрген соң ғана арнайы аппараттың көмегіне жүгінуге тура келеді, – дейді ол.  

Бүгінде жол жөндеушілер орындауы тиіс қызметтік міндеттер санатына қатар жатқан қос рельстің кеңейіп-тарылуын қадағалаудан бөлек, темірбетонды шпал болттарының берік бекітілуі мен кастель, КПП бекітпелерінің де бүтіндігін бақылайды. Одан бөлек, олар өздеріне тиесілі учаскеге иесіз малдың жүрмеуіне де жауапты.  

 

Жаңалықтар
04.04.2025
ҚТЖ және Цзиньхуа Көлік-инвестициялық тобы логистикалық кешен салу туралы келісті
Жаңалықтар
04.04.2025
"KTZ Express" қытайлық серіктеспен екі меморандумға қол қойды
Жаңалықтар
04.04.2025
Теміржолшылар мен полиция бірігіп 238 рейд жүргізді
Аймақтар
04.04.2025
Бақытын Болашақтан тапқан
Станция тынысы
04.04.2025
Жұмыс қарқыны жоғары
Жолаушылар тасымалы
04.04.2025
«Ақтөбе-Қазалы» бағыты бойынша рейс ашылды
Сұхбат
04.04.2025
Александр Ширяев: Қажетті вагон паркі мен тиімді тасымал ұсынамыз
Аймақтар
04.04.2025
Бөлімше директоры шағын бекеттерді аралап, теміржолшылармен кездесті
Жаңалықтар / Мұрағат
04.04.2025
Қазақстан теміржолшысы газеті, №25 04 сәуір 2025 жыл
Аймақтар
03.04.2025
Жаңа тепловоздар қызмет көрсетуде
ҚТЖ келбеті
03.04.2025
Аягөздік ардагерге құрмет көрсетілді
Әлемде
03.04.2025
Қырғызстан Ыстықкөлді айналып өтетін теміржол жобасын әзірлеуде
Жолаушылар тасымалы
03.04.2025
ҚТЖ ревизорлары пойызда билетсіз жолаушыларды анықтады
Аймақтар
02.04.2025
Жұмысшы мамандар ұстаханасы
Әлемде
02.04.2025
Өзбекстанда жаңа жолаушылар вагондары таныстырылды
Қауіпсіздік
02.04.2025
Шымкентте жасөспірімдер пойыз вагонына жармаспақ болды
Жаңалықтар
02.04.2025
ҚТЖ-да Словения компанияларымен кездесу өтті
Жолаушылар тасымалы
01.04.2025
Jibek Joly туристік пойызы төртінші рет сапарға аттанады
Жолаушылар тасымалы
01.04.2025
«Астана-Алматы» бағытындағы «Тальго» пойызы енді Шу станциясына тоқтамайды
Жүк тасымалы
01.04.2025
Қаңтар-наурыз айларында темір жол көлігімен 3,6 млн тонна астық тасымалданды