Атырауда су тасқынына қарсы күрестегі еңбегі үшін теміржолшы марапатталды
Атырау облысы бойынша меншікті тілші
«Ауыл» партиясы Атырау жүк тасымалы бөлімшесінің азаматтық қорғаныс және төтенше жағдайлар жөніндегі инженері Нұрлан Сұлтанғалиевті Алғыс хатпен марапаттады.
Биылғы су тасқыны өңір тұрғындарын үлкен әбігерге салғаны рас. Атырауда қалаға су кіргізбеу үшін жаға бекіту жұмыстары сәуір айының бас кезінен мамырдың ортасына дейін жалғасты.
Елді елеңдеткен, халықты алаңдатқан су тасқынына қарсы бүкіл қала, аудан жұртшылығы болып өре түрегелді. Олардың қатарында теміржолшылар да бар еді. Атырау жүк тасымалы және магистральдық желі бөлімшелеріне қарасты құрылымдық мекеме ұжымдары осы іске белсене кірісіп, бір кісідей боп жұмыла атсалысты. Сол жұмыстардың басы-қасында жүргендердің бірі осы Нұрлан Сұлтанғалиев еді. Сондықтан «Ауыл» партиясы Атырау филиалының төрағасы атынан табиғи апат – қарғын су мен көктемгі су тасқыны кезінде жағалауды бекіту, бөгет соғу жұмыстарына, табиғи апаттың зардабын жоюға көрсеткен жан-жақты көмегі үшін Алғыс хатпен марапатталып, оны облыстық мәслихат депутаты Қадыржан Арыстан табыс етті.
