Айрықша статусы бар станция бастығы

Маңғыстау-Ақтау порты, Маңғыстау-Болашақ, Маңғыстау-Құрық порты, Маңғыстау-Бейнеу бағыттарына қызмет көрсететін ерекше станцияны басқарып отырған Бағыбай Исатаевқа барша әріптестері қызығады.

Төрт бағытта қызмет көрсететін бұл айрықша статусы бар станция түбектегі жүк тасымалының салмақты жүгін көтеріп отыр. Сондай жауапкершілігі жоғары жұмысты абыроймен атқарып жүрген станция бастығы бір кездері еңбек жолын осында жүк қабылдап-тапсырушы болып бастапты.  

1966 жылы Түркіменстанда көп балалы теміржолшылар отбасында туған ол Алматыдағы теміржол институтын бітіріп, Маңғыстауда пойыз құрастырушының көмекшісі, пойыз құрастырушы, №16, «Р» бекеттері мен Маңғыстау, Ақтау порты станцияларында кезекші, Жетібай станциясының бастығы, Болашақ станциясында бас инженер, Өзен станциясының бастығы сынды қызмет сатыларынан өтіп, тәжірибе жинақтайды. 4-5 жыл Маңғыстау станциясында бас инженер болып, соңғы бірнеше жыл станция бастығы қызметінде.  

– Теміржолға 45 жылын сарп еткен әкем марқұм Мақсұт Исатаев мен туғанда Мары станциясында кезекші екен. Сол жұмысын Маңғыстауға оралғасын №16, «Р» бекеттерінде жалғастырды. Анам Дыбыс Исатаева да сегіз баласын тәрбиелей жүріп ширек ғасыр жолшы болып еңбек етіпті. Қазір жанұямызда ағам Өсер екеуіміз сол кісілердің жолын жалғап жүрміз. Жалпы, бұл мамандық маған көп нәрсе берді және ұқтырды. Ойымдағы аруды да осынан жолықтырдым. Құдай қосқан қосағым Жанаргүл екеуіміздің шаңырақ көтеріп, бір салада қол ұстасып жүргенімізге отыз жылдан асыпты. Бағытымыз бір болғасын бір-бірімізді қолдап, түсіністікпен өмір сүрудеміз. Жұбайым қазір Маңғыстау қосалқы бөлімінде жүк тасымалы және коммерциялық бөлімінің басшысы. Бір ұлымыз бар. Ол өз қалауымен заң саласын таңдаған, – дейді Бағыбай Мақсұтұлы отбасы жайлы сөз еткенде.  

Ол қазір екі жүзден аса адам қызмет ететін станциясындағы жұмысты үйлестіріп отыр. Мұндай үлкен мекемеде шаруаны шашау шығармай ширату оңай емес. Бұл тұрғыда ол өзінің жылдар бойы жинаған білім-тәжірибесіне сүйенеді.  

– Жалпы, теміржолшы болудың жауапкершілігі өте жоғары. Жаның теміржолшы болмаса, көпке бармайсың. Мен мысалы, бастапқыда пойыз құрастырушыға көмекші болдым, кейін бұл жұмыс жалғыз өзіме тапсырылғанда бірінші қиындықпен бетпе-бет келдім. Соны еңсере білсең ғана ұтасың. Ол үшін табандылық пен қайсарлық қажет, онсыз қиын да күрделі саланы меңгеріп кету оңай емес, – дейді Б.Исатаев.