Бір жолда тоғысқан қос тағдыр
Түркістан облысы бойынша меншікті тілші
Төребек Мырзақараұлының Шымкент жол дистанциясына қарасты Арыс–Қалаш аралығындағы өткелде еңбек етіп келе жатқанына биыл бақандай 36 жыл толып отыр. Ол 1988 жылдан бері осы бір ғана учаскеде міндетін мінсіз атқарып келеді.
Оның өз тағдыр жолында осыншалықты табандылық танытып, өсіп-өркендеуінің түпкі сыры – әке салған сүрлеу-соқпақпен өмірін ұштастыруында жатқан сияқты. Өйткені 1948-90 жылдар аралығындағы жарты ғасырға жуық кезеңде Мырзақара Орынбекұлы осы Арыс–Қалаш учаскесінде еңбек етіпті. Басаяғы 19 шақырымға созылатын бұл телімді бабында ұстау үшін қыс-жаз, күн-түн демей шойын жолдың асты-үстін, қиыршық тастың жай-күйіне дейін мұқият қадағалайтын әке тірлігі Төребектің жадында жатталып қалған. Әкесі Мырзақара өмір сүрген ғұмырының 42 жылында дәл осы жұмыстың шашауын шығармай орындаған болса, бүгінгі таңда оның ұлы Төребектің де осы телімде жұмыстың үдесінен шығып келе жатқанына 40 жылға жуықтапты. Қызығы сол, әкелі-балалы екеу бір учаскені 80 жылға жуық күтіп ұстап келеді. Анығы, әкелі-балалы теміржолшының еңбек өтілі 78 жылды құрайды екен. Бұл қазіргі көрсеткіш. Ал Төребек ағамыздың әлі де тың әрі жұмысқа деген құлшынысын ескерсек, бұл отбасының теміржол саласында, осы телімдегі еңбек өтілдерінің тарихы әлі де жаңара түсетін секілді.
– Ендігі мақсатым – әкемнің жетістігіне жетсем деймін. Мен зейнетке шыққанша тағы 4-5 жыл еңбек етуім керек. Міне, сол кезде әкем шыққан биіктен асып түспесем де, соған жетермін. Ендігі межем осы, – дейді әке жолын қуған ұл.
Әкелі-балалы теміржолшылардың өмірінде тағы бір мынадай сәйкестік бар. Төребектің әкесі Мырзақара 1986 жылы 57 жасында «Құрметті теміржолшы» атанған екен. Ал енді оның ұлы Төребек те тап осы жасында, тап осы учаскені үздіксіз күтіп-баптағаны үшін осынау құрметті атаққа ұсынылып отыр.
Төребек Мырзақараұлының 8 бауыры бар. Бес ұлдың кенжесі ретінде әке-шешенің бауырында еркелеп өскен Төребек бүгінде зайыбы Бану екеуі 2 ұл, 2 қыздан оншақты немере сүйіп, ата-әже атанған абыройлы жандар.
Болашақта өсіріп отырған немере буыннан да әулеттің даңқты еңбек жолын жалғайтын теміржолшы шығады деген үміттерін үкілеп отырған жайлары бар.