Теміржолшыға тән қасиет

Сексеуіл локомотив пайдалану депосында көп жыл машинист, нұсқаушы болып еңбек еткен Жақсылық Сүйінқараев балаларына теміржолшыға тән қасиет – ең алдымен темірдей төзім деп өсиет айтады екен.

Талғат Сүйінқараев 1991 жылы депоға қатардағы жұмысшы болып қабылданғанда әкесінің айта беретін әлгі сөзінде қаншалықты мән бар екенін бірден түсінген жоқ бәлкім. Бірақ жылдар өте әкесінен берілген табандылығы арқасында тепловоз машинисіне дейінгі қиын да күрделі ұзақ жолдан өтеді. Темірдей төзімділігі мен жігері депоның маңдай алды тепловоз машинисі дәрежесіне көтерді. Депо мен бөлімше басшылығының сеніміне ие болып, құрметке бөледі. Ол өзіне көрсетілген құрметтің есесін нағыз теміржолшыға тән жауапкершілікпен қайтара білді. 

Талғаттың жолы тіпті де жеңіл болған жоқ, депода он шақты жыл слесарь жөндеуші болып еңбек етіп, тек 2003 жылы машинист көмекшісі болды, арада тағы он шақты жыл өткенде, 2013 жылдан бастап тепловоз машинисі болды. Әке өсиет еткен темірдей төзім деген осы емес пе?! 

Жалпы Сүйінқара қарияның балаларының үшеуі де әулет дәстүрін жалғастырып, бірі машинист, бірі кезекші, бірі тепловоз маманы болды. Ал Жақсылықтан тараған Талғаттың өз балалары Мақсат Астана депосында машинист көмекшісі, Барысхан Жезқазған депосының машинист көмекшісі болып, ата жолын жалғастырып келеді екен.

– Арал топырағында 1974 жылы туғанмын. Әкем Жақсылық Сүйінқараев өңірге танымал теміржолшы болған соң ұлдары түгел сол әкеге қарап бой түзеп, тәлімін алып өстік. Кішкентайымыздан теміржол бойының тіршілігімен етене таныс болғандықтан орта мектепті бітіргенде де теміржолдан өзге салада тіршілік жоқтай көрініп бірден таңдау жасадым. Теміржолшы болу кез келген адамның пешенесіне жазыла бермесе керек. Бұл салада шыдамдылық, жігер, байсалдылық пен кәсіпке деген адалдық болуы керек деп ойлаймын, – дейді өз ісінің шебері атанған Талғат Жақсылықұлы.