Теміржолшы әулеттерімен кездесу өтті (Фото)

ҚТЖ бас ғимаратындағы музейде компанияның Автоматтандыру және цифрландыру дирекциясы теміржолдағы династиялар өкілдерімен кездесу ұйымдастырды. 5 қыркүйек – Қазақстан халқы тілдері күніне орай өткен жиын «Теміржол ардагерлері – ҚТЖ ұлттық компаниясының алтын қоры» деп аталып, белгілі теміржолшы әулеттер өкілдері арнайы шақырылды.  

Алғашқы сөз кезегі берілген Құрметті теміржолшы, ҚТЖ  Консультативтік кеңес хатшысы Қуаныш Котырев өзінің еңбек жолынан  қызықты естеліктерімен бөлісті.  

– Теміржол бойында өстік, бала кезімде теміржолшыларға, олардың жарқыраған формасына қызыға қарап, мен де теміржолшы боламын деп армандадым. Өзімнен біраз үлкен ағам Мансұр Котырев 14 жасынан теміржолда жұмыс істеді. Біздің әулеттің теміржолдағы еңбек жолы осылай басталды. Мен 62 жыл ғұмырымды осы саланы дамытуға арнадым. Мен ағама қарап бой түзесем, ұлым Батыр маған қарап осы жолды таңдады. Әулетімізде 41 адам теміржолда жұмыс  істеп, кейінгі буын әлі де жалғастырып келеді. Солардың бәрінің еңбек өтілін қосқанда 978 жылды құрайды, 4 адам «Құрметті теміржолшы» атағына ие болды, – деді Қ.Қуанышев.

Келесі кезекте сөз алған белгілі династия өкілі, Ардагерлер Кеңесі Орталық аппаратының төрағасы Берік Айтбеков те естеліктерімен бөлісіп, өзінің теміржолшылар әулетінің үшінші буыны екенін жеткізді. Бүгінде 20 шақты өкілі теміржолда еңбек ететін әулеттен үш «Құрметті теміржолшы» шыққан.    

ҚТЖ Омбудсмені Батыр Котырев та өзінің теміржол саласының бір бөлшегі болғанын мақтан ететінін айтты. Компанияның Орталық Аппарат басшысы Серік Кеулімжаев атақты теміржолшылар әулеттері өкілдерінің көбі жан-жақты екенін, түрлі өнерімен танылып, спортта да алда болып, көпке үлгі болып жүргенін айтып өтті. Сонымен қатар мұндай іс-шаралар мемлекеттік тіл аясын кеңейту мақсатында жиі өткізіліп жүргеніне тоқталды.

 – Н.Есенғариннің кітаптарындағы деректерге сүйенсек, ҚТЖ-да 200 жылдық еңбек өтілі бар 350-ден астам әулет бар. Бұл ең төменгі көрсеткіші, жалпы еңбек өтілі 900 жылды құрайтын әулеттер де бар. Сондықтан Еңбек күні аталып өткенде «Үздік отбасылар» сынды байқауларда теміржолшылар үнемі жүлделі орындарды иеленеді. 2022 жылы «Гиннестер рекордтар кітабына» қызылордалық теміржолшылар әулеті кірді, – деді музей менеджері Ақмарал Молдашева.  

Жиын барысында ұйымдастырушылар танымдық сұрақтар қойып, викториналық ойын өткізді. Дұрыс жауап бергендерге «Қазкөліккәсіп» ҚБ төрағасы Оразғали Ахметбаев кәсіподақ атынан сыйлық ұсынды. «ҚТЖ» ҰК» АҚ Автоматтандыру және цифрландыру дирекциясы филиалы директорының орынбасары Әсет Нұрболұлы іс-шараны мазмұнды, мағыналы өтуіне атсалысқан қонақтарға алғыс айтты.