Арыстан Сарышағанға дейін...

Тоғыз жолдың торабы Арыс қаласында туып-өскен Мақсат Исаевты Сарышағанда жолықтырдық. Білуімізше, Арыс – ежелден теміржолшылар қаласы аталып кеткен ғасырдан астам тарихы бар ірі тораптық станция. Болашағын осы саламен байланыстырған білікті маманға онда мүмкіндік мол.

Рас, Сарышағанды да теміржолшылар кенті деп атайды. Жеті мыңға жуық халқы бар елді мекен тұрғындарының 70 пайыздан астамы шойын жолдан табыс тауып отыр. Десе де, ауқымы мен мүмкіндігі жағынан Арыспен салыстыруға келмес. Сондықтан Мақсатқа алғашқы сауалымыз «Бұл жерге қалай келдіңіз?» болды. Кейіпкеріміз әңгімені әріден бастады.  

– Теміржолшының еңбек және өмір жолы тура осы шойын жолдың өзі секілді. Қай кезде қайда бастап апарарын, қай жерде қандай еңбек ұжымымен жолы түйісерін білмейді. Сенім артып, жауапкершілік жүктесе, шақырған өңірге барады, белді бекем буып, қызмет етеді. Әкем Сейдалы Сәметұлы ШЧ-38 – Арыс белгі беру және байланыс дистанциясында электромонтер болып 42 жыл, анам Райхан Сарманқызы Арыс вагон пайдалану депосында вагон қараушы болып 32 жыл жұмыс істеген. Олардан тараған 8 ұл-қыз түгел осы саланы таңдадық. Екі ағам – Астанада, біреуі – Қызылордада, тағы бірі – Ақсу-Дегелеңде, басқалары Арыста еңбек етіп жүр, – деді  Сарышаған белгі беру және байланыс дистанциясының қызметкері.

Мақсат Исаев 1999 жылы Тараз қаласында электромеханик курсын бітірген соң жұмысқа орналасып, өндірістен қол үзбей Алматыдағы М.Тынышбаев атындағы Қазақ көлік және коммуникациялар академиясында оқып, 2006 жылы жоғары білім алады. Шанақ-Шеңгелді учаскесінің аға электромеханигі, Арыс 2-Құмшағыр учаскесінде телім бастығы қызметтерін атқарды. 2012 жылы Сарышаған белгі беру және байланыс дистанциясы директорының орынбасары лауазымына тағайындалып, 2016 жылдан бері бас инженер болды. Қазір орталық лабораторияда төл құжаттар бөлімінің бастығы.  

– Бұл сала да әскери қызмет секілді. Сенім артып, қайда шақырса сонда барасың. Теміржолшылар қаласынан теміржолшылар кентіне осылай келдім, – деді Мақсат Исаев.

Мақсат Сейдалыұлы әулетте кенже ұл екен. Алты ағасы, екі әпкесі де тағдырын теміржолмен байланыстырған. Жұбайы Айгүл, қызы Сәулет пен үлкен ұлы Әділет те теміржолда бірнеше тәжірибе жинап үлгерген мамандар. Тек кенже ұлы ғана қазір Астанада теміржол колледжінде білім алып жатыр. Бүгінде Исаевтар әулетінің 20-ға жуық мүшесі шойынжолда тер төгіп жүр екен, тұтас еңбек өтілдері – 354 жыл.

Жалпы, басқа салаға қарағанда теміржолда еңбек дәстүрі мен ұрпақтар сабақтастығы нық сақталатынын байқауға болады. Президент Жолдауында айтылған «Адал азамат – Адал еңбек – Адал табыс» қағидатының нағыз көрінісі – осы шойын жолдың бойында десек, қателеспейміз.