Аягөздің құрметті азаматы
Абай облысы бойынша меншікті тілші
Жуырда Аягөз өңірінің дамуына еңбегі сіңген бірқатар мамандық иелері ауданның Құрметті азаматы атанды. Олардың арасында теміржол саласының майталмандары да бар.
Атап айтсақ, осы салада 40 жылдан аса еңбек етіп, алғашқы еңбек жолын шебердің көмекшісінен бастап, адал еңбегі мен кәсіби біліктілігінің арқасында депо бастығы лауазымына дейін көтеріліп, Қазақстан теміржолының дамуына елеулі үлес қосып, көптеген шәкірт тәрбиелеген Сейтбек Ешмұратов та марапат иесі атанды.
Сейтбек Назарұлы Ақтоғой – Саяқ, Достық – Алашаңқай телімінің ашылуына, ондағы жолаушы және жүк пойыздары қозғалысының жолға қойылуына өз үлесін қосқан азамат ретінде де әріптестері арасында зор құрметке ие.
Ақтоғай станциясында елеулі жылдар бойы еңбек етіп, кейіннен кәсіпкерлік саланың да тетігін тауып, әлеуметтік аз қамтылған отбасыларға материалдық көмек көрсеткені өз алдына бөлек әңгіме. Сондай-ақ ауылдарға тасқын су қатері төнгенде өз техникасын жұмылдырып, көпшіліктің алғысына кенелген болатын. Туып-өскен өлкесіне сіңірген еңбегі зор.
Аягөз қаласында өткен салтанатты жиын барысында Сейтбек Назарұлын Абай облысының мәслихат хатшысы «Алғыс хатпен» марапаттаса, аудан әкімі «Аягөз ауданының Құрметті азаматы» төсбелгісін салтанатты түрде табыстады. Бұл, сөз жоқ, еңбек адамына, меценат азаматқа көрсетілген жоғары баға екені анық.