Еңбек адамы: Сарысайдың станция кезекшісі
Ақтөбе облысы бойынша меншікті тілші
«Ғасыр құрылысы» атанған «Хромтау-Алтынсарин» магистралі бойында пайда болған Сарысай станциясы шағын ауылдың тіршілік тамырына қан жүргіртіп тұрған жүрегі іспетті.
Станциядағы басты жұмыс – жүк тиеу. Орта тәулікпен күніне 4-7 пойыз қабылдап, өткізеді. Негізінен кен және қиыршық тас тиеледі. Жерасты қазбаларға бай Хромтау аймағында тиелетін кен, қиыршық тас тиеген вагондар осы Сарысайдан өтеді. Мұнда қазір «Восход Трейдинг» зауыты жұмыс жасап тұр. Кірме жолда кен тиеледі. Ал «Базальт-А» ЖШС қиыршық тас шығарады, тиейді.
Станция кезекшісі Айдаралы Бижанов – аумақта теміржол қатынасы орнағаннан бастап осы саланы меңгерген жергілікті тұрғындардың бірі. Оның теміржолға бет бұрғанына биыл 17 жыл. Еңбек жолы 18 жасында Никельтау жол дистанциясында бастады. 2008 жылы станцияға ауысып, жүк қабылдаушы болды. Кейін Сарысайға жүк қабылдап-тапсырушы болып ауысты. 2009-2019 жылдар аралығында осы жұмыста тиянақтылығы мен жауаптылығын көрсете білді, сонымен қатар білімін жетілдіруді де ұмытқан жоқ. 2019 жылдан бастап Сарысай станиясының кезекшісі болып еңбек жолын жалғастыруда.
– Сарысай – «Хромтау-Алтынсарин» темір жолының бойындағы 7 станцияның бірі. Өңірге темір жолдың салынуы жергілікті халықтың тұрмыс-тіршілігіне айрықша әсер еткен оқиға болды. Ауыл тұрғындары станцияға және станция бойында бой көтерген нысандарға жұмысқа тұрып, балаларын темір жолдың оқуына жіберіп, жергілікті халық теміржолшы мамандығын тез игере бастады. Біздің отбасы бұл кәсіппен ертеден таныс, әкем теміржолшы, жолшы болған. Ағам да ширек ғасыр ғұмырын шойын жолға арнаған, «Құрмет» орденін иеленген теміржолшы. Станция кезекшісі – ауысымдық жұмыс, өзіме өте ұнайды. Пойызды қабылдау, жөнелту, келген пойыздармен операциялық жұмыстарды жүзеге асыру, вагон депосы жұмысшыларымен бірге вагонды тексерген соң жолға дайындау сынды қым-қуат қимыл-қозғалыстың ортасында отырып уақыттың қалай өткенін білмей қаласың, – деді Сарысай станиясының кезекшісі Айдаралы Бижанов.
Станция кезекшісінің алдында тұрған «Ауысым кестесінде» вагондардың әрбір қозғалысы сызылып-жазылып отырады. Таблода станция жолдары да ап-анық көрініп тұр.
– Міне, мынау қызыл жолақтағылар «вагондар тұр» дегенді, ал түссізі «бос жолдар» дегенді білдіреді. Он минутта мына жолды босатып, оған жүк пойызын қабылдайтын боламыз, – деп тәптіштей түсіндірді таблодан көз алмай телефонмен қозғалысты реттеп отырған теміржолшы Айдарлы Бижанов.