Отбасында қалыптасқан қасиет
Қызылорда облысы бойынша меншікті тілші
Қызылорданың Арал теңізі станциясының жүк қабылдап-тапсырушысы Маржан Ақпаева – теміржол саласында бірнеше буын алмасқан атақты Шүреновтер әулетінің өкілі. Көпбалалы ана жұмыс пен отбасы тіршілігін қатар игеріп, еңбекқорлығымен көпке үлгі болып келеді.
Әріптестері Маржанды тек кәсіби маман ғана емес, отбасының тірегі, бес баланың ардақты анасы ретінде де құрмет тұтады. Ал Маржанның айтуынша, теміржол – бұл тек жұмыс емес, бұл – өмір мектебі, тәртіп пен жауапкершілік, тұрақты табыс көзі сынды игілікті қағидалардың тінімен көмкерілген сала.
– Теміржолшылар отбасында өскен Маржан үшін станциядағы жұмыс таңсық емес, алғашқы күннен бастап өзін нағыз маман ретінде көрсете білді. Қазір ол тек өз ісінің шебері ғана емес, студенттер мен жас мамандар үшін тәлімгер ұстаз болып отыр, – дейді Арал теңізі станциясы бастығының орынбасары Наурызбек Жұмабаев.
Маржан Жеңісқызы 1990 жылы осы Арал ауданында дүниеге келген. Мектептен кейін Ақтөбе көлік коммуникация және жаңа технологиялар колледжіне түсіп, оны бітірген соң Арал теңізі станциясына жүк қабылдап-тапсырушы болып орналасқан күннен бері он жылдан аса уақыт өтіп те кетіпті. Осы уақыт ішінде нағыз теміржолшы болып қалыптасып үлгерді. Әрбір вагонның құжаттарын мұқият тексеріп, жүктің дұрыс қабылданып, уақытылы жөнелтілуін қадағалайтын әдеті – бала кезден отбасында әке тәрбиесімен қалыптасқан қасиет. Сосын қызметін атқара жүріп, кәсіби шеберлігін де үнемі жетілдіріп отырады. Бұл да теміржолшы әулет ұстанған қағиданың бірі.
– Өткен ғасырда атам мен әжем теміржол саласында ұзақ жылдар еңбек еткен. Әкем Жеңіс машинист болды, бауырлары да түгел теміржолшылар. Осындай еңбекқор әулетте өскен мен үшін де теміржол өте ыстық. Осы саланы, өз кәсібімді жақсы көргендіктен шығар, станцияға практикадан өтуге келген студенттерді қуана-қуана қамқорлығыма алып, білгенімді үйретемін. Болашақ теміржолшыларға таңдаған мамандығының маңызын, жауапкершілігін және абыройын көрсетіп, теміржолшылардың нағыз тұлға екенін көрсетуге күш саламын, – дейді теміржолшылар әулетінің жарқын өкілі Маржан Жеңісқызы.
